DILI, 24 janeiru 2025 (TATOLI)—Meza Parlamentu iha tempu badak sei tau ajenda iha plenária hodi hala’o eleisaun hili reprezentante PN ba Conselho de Imprensa Timor-Leste (CI).
“Ha’u hanoin pedidu membru sei mantein ne’e atu troka, ami sei fó ninia kandidatu antes fevereiru para tomada pose no iha líder bankada mós ko’alia ona, (kandidatu) iha ona, agora entre kandidatu sira ne’e ita atu hili ida ne’ebé tenke ko’alia ba malu entre bankada,” Prezidente Parlamentu Nasionál (PPN), Maria Fernanda Lay, hato’o ba jornalista sira iha resintuParlamentu Nasionál (PN), sesta ne’e.
Iha tempu badak meza ajenda iha plenária hodi bele hala’o eleisaun tanba konselleiru atuál iha CI ninia mandatu sei termina tempu dabak.
“Ida-ne’e ita-boot sira akompaña de’it, klaru iha prazu másimu,” nia tenik.
Notísia relevante : Conselho de Imprensa husu PPN prepara kandidatu reprezentante PN ba CI
Tuir lei Komunikasaun Sosiál númeru 5/2014, 19 Novembru, iha artigu 45 kona-ba kompozisaun Conselho de Imprensa hamutuk membru na’in-lima, ne’ebé atu hili liuhusi dalan tuir mai:
- Reprezentante jornalista na’in-rua ne’ebé sira hili tiha ona liuhusi eleisaun;
- Reprezentante órgaun komunikasaun sosiál ida, ne’ebé órgaun sira hili tiha ona liuhusi eleisaun;
- Sidadaun na’in rua ne’ebé ho kapasidade be ema hotu hatene no iha méritu profisionál ho preferénsia ne’ebé hatutan ba komunikasaun sosiál, hosi sira-na’in rua ida nu’udar jurista, ne’ebé Parlamentu Nasionál hili.
- Membru sira Conselho Imprensa hili entre sira-nia prezidente.
Iha artigu 46 kona-ba mandatu membru CI nian iha durasaun tinan ha’at, ne’ebé sei bele renova dala ida de’it.
Entrertantu, liuhusi konferénsia konjuntu parte husi parte asosiasaun jornalista hanesan Timor-Leste Press Union (TLPU), Assosiasaun Jornalista Timor-Leste (AJTL) no Uniaun Profisionál Jornalista Timor-Leste (UPJTL), ne’ebé realiza konferénsia husi CI iha tinan kotuk hili ona reprezentasaun jornalista ba períodu 2025-2029, mak hanesan Joaquim Coutinho no Cesar Mali no reprezentante mídia-na’in, Suzana Cardoso.
Jornalista : Nelson de Sousa
Editora : Julia Chatarina
