iklan

MUNISÍPIU

PNTL Viqueque sei asegura eleisaun suku foun iha Uatulari

PNTL Viqueque sei asegura eleisaun suku foun iha Uatulari

PNTL Viqueque sei asegura eleisaun suku foun ihA Uatulari. Imajén Tatoli/Vitorino Lopes da Costa.

VIQUEQUE, 24 janeiru 2025 (TATOLI)—Polísia Nasionál Timor-Leste (PNTL) munisípiu Viqueque sei asegura eleisaun suku foun ne’ebé sei realiza iha suku Macadique de Baixo no Macadique Uaitame, sábadu (25/01) aban.

Notísia Relevante: 25 janeiru: STAE Viqueque realiza eleisaun ba suku foun rua iha Uatulari

“Ba eleisaun komunitária ba suku foun rua ne’ebé realiza iha sábadu ne’e, ami sei asegura prosesu eleisaun suku. Nune’e ba parte seguransa iha obrigasaun atu relata ba komandu jerál hodi haree mós atividade eleisaun suku ne’ebé realiza iha postu Uatulari, munisípiu Viqueqeu,” Segundu Komandante Polísia Nasionál Timor-Leste (PNTL) munisípiu Viqueque, Domingos Gomes, hateten ba Agência Tatoli iha munisípiu Viqueque, sesta (23/01) ne’e.

Tanba ne’e, nia husu eleitór sira iha suku Macadique de Baixo no Macadique Uaitame atu partisipa iha eleisaun suku hodi hili sira-nia lideransa suku.

“Ba realizasaun eleisaun suku ida-ne’e, ita husu komunidade nia partisipasaun atu ezerse sira-nia diretu votu iha suku ida-idak hodi hili sira-nia lideransa suku,” nia dehan.

Nia hateten, eleisaun komunitária la hanesan ho eleisaun prezidensiál no eleisaun parlamentár, nune’e husu komunidade tenke kria pás no estabilidade.

“Ami nafatin halo koordenasaun ho Ofisiál Polisiamentu Suku (OPS), eskuadra Uatualari hodi halo aproximasaun ba komunidade atu fó hanoin ba ita-nia komunidade. Katak, eleisaun ne’e ita hili lideransa komunitária la’ós kompete iha festa demokrásia partidaria. Tanba ne’e, ha’u husu komunidade husi suku foun rua ne’e atu kria pás no establidade iha loron eleisaun ne’e,” nia dehan.

Tanba ne’e, nia informa, PNTL sei bandu ema lori sasán kro’at sira iha sentru votasaun no bandu labele hemu alkól besik iha sentru votasaun 13 ne’ebé iha suku Macadique de Baixo no Macadique Uaitame.

Iha fatin seluk, xefe suku Macadique, Afonso dos Reis, hateten antes ne’e suku Macadique iha aldeia hamutuk 21 ne’e sente defisil hodi kontrola no dezenvolvimentu tanba estabelese tán suku foun ne’e hodi hafasil dezenvovimentu.

“Tanba ida-ne’e sai hanesan ezijénsia komunidade suku Macadique hodi loke suku foun rua ne’ebé aban (sábadu-25) realiza eleisaun. Ita-nia komunidade sei koopera ho entididade sira inklui parte seguransa hodi segura eleisaun to’o susesu,” nia dehan.

Tuir dadús, eleitór husi suku Macadique de Baixo ne’e iha aldeia hitu (7) ho totál eleitór hamutuk 2,668 no suku Macadique Uaitame totál aldeia hamutuk (6) ho totál eleitór hamutuk 1, 253.

Jornalista  : Vitorino Lopes da Costa

Editór         : Cancio Ximenes

iklan
iklan

Leave a Reply

iklan
error: Content is protected !!