VIQUEQUE, 23 janeiru 2025 (TATOLI)—Sekretariadu Téknika Administrasaun Eleitorál (STAE) munisípiu Viqueque preparadu atu realiza eleisaun suku foun ba suku Macadique de Baixo no Macadique Uaitame iha postu Uatulari, iha 25 janeiru 2025.
Diretór STAE munisípiu Viqueque, Humberto Fernandes, hateten preparasaun ba eleisaun komunitária ba suku foun rua iha postu Uatulari ne’e responsabliza husi autoridade munisípiu no postu administrative, servisu hamutuk ho STAE no Komisaun Nasionál Eleisaun (CNE, sigla portugés) hodi organiza eleisaun.
“Preparasaun sira-ne’ebé ami prepara ba elaisaun, iha 28 dezembru 2024, ami halo sensibilizasaun kalendáriu eleisaun nian ba eleitór sira husi suku foun rua ne’e. Nune’e, iha 07 janeiru 2025, suku rua halo enkontru kona-ba aprezentasaun kandidatu xefe suku foin lalais iha 10 janeiru 2025, no ba suku rua ne’e kandidatu na’in-tolu (3),” Diretór STAE munisípiu Viqueque ne’e hateten ba Agência TATOLI, iha nia kna’ar fatin, edifísiu munisipál, ohin.
Nia dehan, eleisaun ne’e ba xefe suku de’it tanba estrutura seluk hanesan xede aldeia, delegadu no delegada, lia-na’in, xefe juventude feto no mane ne’e, avansa ho estrutura anterior nian.
Entretantu, eleisaun suku ba suku foun rua ne’e, STAE prepara pesoál apoia aldeia na’in-13 no suku na’in-rua (2) ho totál hamutuk na’in-15 ne’ebé sei koloka ba suku rua no totál sentru votasaun iha aldeia hamutuk 13.
Nune’e mós, nia dehan, pesoál apoia suku oferese ona edukasaun votante ba eleitór sira atu bele partisipa iha eleisaun suku ne’e la’o ho di’ak.
“Eleisaun ne’e órgaun STAE, CNE no diresaun ONG munisipál kontinua halo komunikasaun ba malu hodi realiza eleisuan ba suku rua la’o ho susesu,” nia dehan.
Diretór Servisu Munisipál Apoia Organizasaun Naun Govermental no Organizasaun Komunitáriu, Cosme Sarmento, informa autoridade munisípiu no postu kolabora hamutuk ho Sekretariadu Téknika Administrasaun Eleitorál (STAE) no Komisaun Nasionál Eleisaun (CNE, sigla portugés) hodi organiza eleisaun ba suku foun rua,
“Ami-nia kolaborasaun entre autoridade Viqueque liuhusi diresaun apoiu ONG, STAE no CNE ami la’o pakote ida. Durante ne’e, ami koopera hamutuk mak halo preparasaun no fó formasaun ba ita-nia ekipa meza ba eleisaun suku foun rua ne’ebé iha postu Uatulari,” Cosme Sarmento, hateten ba Agência TATOLI, ohin.
Kona-ba prepasaun eleisaun, nia dehan, agora daudaun Diresaun ONG, STAE no CNE dezloka ba suku Macadique hodi forma ekipa meza eleisaun ne’ebé sei realiza iha sábadu (25 janeiru 2024).
“Agora daudaun, ami dezloka ba suku Macadique hodi forma meza asembleia eleisaun nian. Aban, ita hahú distribui materiál sensitivu no la sensitivu ba suku rua, hodi nune’e iha sábadu (25/01) ne’e hahú eleisaun hodi hili xefe suku,” nia hateten.
Iha eleisaun suku ne’ebé sei realiza iha 25 janeiru ne’e, kandidatu xefe suku iha suku Macadique de Baixu ne’e kandidatu úniku no kandidatura xefe suku ba suku Macadique Uaitame ne’e iha kandidatu ema na’in-rua (2) ne’ebé sei kompete iha eleisaun suku ne’e.
Antes ne’e, Prezidente Autoridade Munisípiu Viqueque, Francisco C.S de Gonzaga Soares, akompañadu husi Diretór STAE, CNE no PNTL Viqueque, iha tersa (21/01) ne’e, simu ona materiál sensitivu no non sensitivu husi nasionál hodi apoiu prosesu eleisaun autoridade suku foun ne’e.
Tuir dadús, eleitór sira-ne’ebé atu tuir votasaun iha suku Macadique de Baixo iha aldeia hitu (7) ho totál eleitór hamutuk 2,668 no suku Macadique Uaitame iha aldeia hamutuk neen (6) ho totál votante hamutuk 1,253.
Jornalista : Vitorino Lopes da Costa
Editór : Cancio Ximenes
