COVALIMA, 23 janeiru 2025 (TATOLI) – Servisu Munisipál Administrasaun Rekursu Umanu (SMARU) aprezenta pontu 15 hodi halo diskusaun ho diretór servisu munisipál no diretór delegasaun territoriál sira ho Administradór postu hitu liuhusi reuniaun Konsellu Koordenasaun Munisipál (KKM).
Diretór Servisu Munisipál Administrasaun Rekursu Umanu (SMARU), José Manuel Gonçalves aprezenta pontu sira mak hanesan, enkuadramentu legál, introdusaun, Objetivu, Papél Servisu Munisipál Administrasaun no Rekursu Umanu, Organograma, Dadus Funsionáriu 2024, Mapa pesoál, kargu no diresaun sira, atividade 2024, ezekusaun orsamentu 2024, Sumáriu ba lisensa, tranferénsia destakamentu, Planu orsamentu 2025, Dezafiu no rekomendasaun.
“Ohin ha’u halo aprezentasaun pontu 15 tanba iha Servisu Munisipál Administrasaun rekursu umanu nu’udar servisu ne’ebé tutela ba Prezidente Autoridade Munisipál bazeia ba dekretu-lei ne’ebé hatuur kona-ba estabelesimentu kargu Diresaun no xefia ba Servisu Munisipál administrasaun rekursu Umanu,” José Manuel Gonçalves aprezenta iha salaun AMC, ohin.
Dirijente ne’e aprezenta baze legál sira hanesan Dekretu-lei númeru 84/2023, 23 novembru kinta alterasaun Dekretu-lei númeru 3/2016, 16 Marsu aprova estatutu administrasaun munisipál ba autroridade munisípiu no Grupu Tékniku Interministeriál ba desentralizasaun administrativa
Alende ne’e Diploma Ministeriál númeru 85/2023, 29 Dezembru, aprova hodi estabelese servisu munisipál ba autoridade munisípiu define perspetiva no funsionamentu. Lei númeru 8/2004, 16 juñu kona-ba estatutu funsaun Públika.
Dekretu-lei númeru 44/2011, 21 setembru, alterasaun ba daruak ba dekretu-lei númeru 34/2008, 27 agostu , kona-ba Rejime konkursu, rekrutamentu, selesaun no promosaun pesoál administrasaun públika no dekretu- lei númeru 25/2016, 29 juñu, kona-ba kargu diresaun xefia no administrasaun públika.
Papél SMARU hala’o nia kna’ar atu asegura no apoiu servisu tékniku administrativu sira ba Prezidente Autoridade Munisipál, tuir asuntu idaidak, no mós servisu órgaun sira seluk ne’ebé integradu iha kontrolu espediente jerál, jestaun dokumentál, jestaun Rekursu Umanu, informátika, hodi koordena tuir sistema sira iha komunikasaun interna, esterna, arkivu no protókolu.
Tuir dadus jerál hodi halo atualizasaun ba funsionáriu permanente hahú husi sekretáriadu munisipál no servisu munipál no administradór postu administrativu hitu hamutuk 374 kompostu husi mane 323 no feto lima.
Atualiza dadus funsionáriu kazuál no koloka ba Sekretáriadu Munisipál no servisu munisipál no ba postu administrativu hitu hamutuk 248 kompostu husi mane 158 no feto 90.
Atividade ne’ebé hala’o iha 2024 mak hanesan fó pose ba sekretáriu Autoridade munisípiu na’in tolu pose ba diretór Servisu munisipál 18, Administradór Postu Administrativu hitu na´in hitu, Prezidente Autoridade Munisipál no halo Rekrutamentu funsionáriu kazuál 211, Funsionáriu Ofisiál Suku 120 no funsionáriu AAP 49.
Orsamentu Jerál Estadu (OJE) iha 2025, ba SMARU hamutuk $ 2,697,872.00 hodi fahe ba kategória ba saláriu no vensimentu $ 2,695,872.00 kategória ba formasaun no diseminasaun hamutuk $2,000.00
Durante ne’e, SMRU hasoru dezafiu sira hanesan, menus fasilidade eskritóriu tan ne’e difísil atu hala’o servisu ho efisiente no efikasia hodi bele fó impaktu ba andamentu servisu loro-loron ladun ho másimu.
Iha sorin seluk, Prezidente Autoridade Munisípiu Covalima, Miguel Armada Cardoso dehan, Autoridade realiza reuniaun konsellu Koordenasaun Munisipál atu halo koordenasaun no disemina informasaun ne’ebé la’o hodi buka hatene.
“Ita sempre hala’o reuniaun konsellu koordenasaun sai hanesan sasukat ida hodi prense avaliasaun kondisaun mínimu, hodi hatene tuir ita hala’o servisu to’o ona iha ne’ebé tan ne’e presiza bolu malu hodi hamosu matrix atu foti desizaun hamutuk,” nia haktuir.
Tan ne’e hato’o agradesimentu ba servisu munisipál ne’ebé mak halo aprezentasaun kona-ba sira-nia servisu liuhusi aprezentasaun hanesan parte ida atu fahe informasaun ba diretór servisu munisipál sira.
Jornalista: Celestina Teles
Editór :Rafael Ximenes de A. Belo
