DILI, 25 janeiru 2025 (TATOLI)—Kandidatu Xefe Suku Hurai-Raco, Valente Matos, hateten abitante hamutuk 692 husi suku Hurai- Raco, postu administrativu Aileu Vila, munisípiu Aileu, ezerse ona sira-nia direitu ba eleisaun órgaun suku ne’ebé hala’o iha sábadu ne’e.
Suku Hurai-Raco antes ne’e hola parte iha suku Seloi-Kraik, maibé iha 2023 hato’o sira-nia pedidu bá Autoridade Administrasaun Munisípiu Aileu, hakarak haketak an sai suku foun. Nune’e, iha 2025, Governu aprova pedidu ne’e no konsidera sai nu’udár suku foun ida husi postu administrativu Aileu Vila.
Kandidatu xefe suku ne’e dehan bainhira nia eleitu iha eleisaun sei kolabora ho Governu atu tau-matan ba povu iha área dezenvolvimentu.
Suku Hurai-Raco iha aldeia rua mak hanesan aldeia Mau-Rusa no Taratihi. Entretantu, kandidatu ba xefe suku Hurai-Raco nu’udár kandidatu úniku.
Eleisaun ba líder suku foun hala’o mós iha suku Karahili, postu Administrativu Remexio, munisípiu Aileu. Suku Karahili antes ne’e hola parte iha suku Asumau maibé iha 2025 suku Karahili deside haketak an. Kandidatu xefe suku ba suku foun referidu iha na’in rua.
Eleisaun suku iha loron 25 janeiru 2025 ne’e sei realiza ba suku 18 iha munisípiu ualu hanesan suku Hurai-Raco, postu administrativu Aileu Vila, munisípiu Aileu, suku Karahili, postu Remexiu, munisípiu Aileu, suku Builai no suku Caibada Makasae, postu Baucau, munisípiu Baucau, suku Ueru-Mata, postu Laga, munisípiu Baucau, suku Poetete, suku Poetete Vila no suku Poetete Lodudu, postu Ermera, munisípiu Ermera, suku Koaliate Leten, postu Hatulia A, munisípiu Ermera.
Suku Assui-lau, postu administrativu Letefoho, munisípiu Ermera, suku Buduro, postu administrativu Lautém, munisípiu Lautém, suku Laku Mesak, postu administrativu Lakló, munisípiu Manatuto, suku Ili-Huli, postu Manatuto, munisípiu Manatuto, suku Tahu Bein, postu Alas, munisípiu Manufahi, suku Mone Meco no suku Cutete, postu Pante Makasar, RAEOA, suku Macadique de Baixo no suku Macadique Uaitame, postu Uatulari, munisípiu Viqueque.
Estabelesementu suku foun iha Timor laran bazeia ba Lei Suku númeru: 19/2023 ne’ebé previstu iha artigu 91, fó kompeténsia ba Ministériu Administrasaun Estatál (MAE) deside kriasaun suku foun referidu.
Jornalista: Natalino Costa
Editór: Xisto Freitas da Piedade
