ERMERA, 25 janeiru 2025 (TATOLI)—Xefe Suku Humboe, postu administrativu Ermera Vila, munisípiu Ermera, Francisco Babo Salsinha, husu ba Governu atu tau-atensaun hadi’a estrada dirasaun Gleno bá Letefoho no Ermera Antiga.
“Foin lalais ami rona iha fulan-marsu ne’e halo lansamentu ona, ne’ebé komunidade kontente, nune’e kontinua husu Governu atu aselera ninia konstrusaun, tanba kondisaun estrada atuál tinan barak ona povu halerik ho estrada ne’ebé ho kondisaun ladi’ak,” Autoridade lokál ne’e hato’o ba Agência Tatoli, iha sede suku Humboe, iha Ermera, sábadu ne’e.
Nia haktuir, parte Ministériu Obra Públika (MOP) nasionál no munisípiu foin lalais tun ona iha suku hodi halo levantamentu ba komunidade afetadu ba konstrusaun no alargamentu estrada.
“Bazeia ba lista ne’ebé ami hetan husi MOP, ami prepara loke konta bankária hodi selu indemnizasaun Humboe ba afetadu 74, entaun sira ne’ebé konklui ona dokumentu no loke konta bánkaria foin daudaun ami entrega ona ba MOP hodi trata indemnizasaun husi Governu,” akresenta.
Notísia relevante : MOP: Estrada dirasaun Gleno-Letefoho-Ermera Lama iha hela prosesu dezeñu
Levantamentu ne’e haree mós komunidade nia plantasaun hanesan kafé no ai-teka.
“Komunidade hotu koopera no esperansa mak Governu ida-ne’e bele hadi’a ona estrada ne’e, tanba tinan barak povu ne’e halerik ho kondisaun estrada,’’ nia tenik.
Tuir observasaun jornalista iha terrenu, nota katak estrada husi Gleno bá Letefoho no Ermera Antiga daudaun iha tempu udan ho kondisaun grave, nune’e difikulta tebes movimentu transporte públiku.
Antes ne’e, reprezentante povu iha uma fukun Parlamentu Nasionál (PN) levanta beibeik kondisaun estrada Gleno bá Letefoho no Ermera Antiga, ne’ebé ho kondisaun grave tebes no husu Governu atu tau-atensaun.
Nune’e, reprezentante Governu liuhusi Vise-Ministru ba asuntu Parlamentár, Adérito Hugo da Costa, fó sai katak, ida-ne’e iha faze atu halo lansamentu konstrusaun iha tempu badak.
Jornalista : Nelson de Sousa
Editora : Julia Chatarina
