ERMERA, 25 janeiru 2025 (TATOLI)—Governu liuhusi Ministériu Administrasaun Estatál (MAE) ho koordenasaun Sekretariadu Tékniku Administrasaun Eleitorál (STAE), sábadu ne’e, realiza eleisaun órgaun suku ba suku 18 iha munisípiu ualu.
Ohin eleitór iha postu administrativu Ermera, munisípiu Ermera husi suku Poetete Villa iha aldeia haat, kompostu husi aldeia vila ho eleitór 600-resin, aldeia Lekisi 1.460, Rematu 300-resin, aldeia Beluli eleitór 556, partisipa másimu iha prosesu demokrátiku ne’e hodi hili sira-nia líder suku ba mandatu tinan hitu.
Suku Poetete Vila realiza eleisaun órgaun suku iha sentru votasaun haat ne’ebé iha kada aldeia.
“Ohin, CNE hala’o supervizaun iha ne’e, situasaun kalma laiha buat ida, eleisaun hahú tuir oras ne’ebé determina, partisipasaun eleitór sira-nia ita haree di’ak hodi uza sira-nia direitu votu,” Membru Komisaun Nasionál Eleisaun (CNE, sigla portugés), Antonino Gonçalves, informa ba Agência Tatoli, iha sentru votasaun Vila, iha sede suku Poetete Vila.
Notísia relevante : Eleitór Poetete Vila partisipa másimu iha eleisaun órgaun suku
Nia haktuir, CNE nia observasaun nota katak Komisaun organizadora realiza prosesu eleisaun ne’e tuir regra jerál prosesu eleitorál. Maibé sujere atu hadi’a liután kompozisaun meza iha fotografia kandidatu sira-nia.
“Maibé, observasaun jeralmente la’o di’ak laiha problema signifikante,” nia akresenta.
Aleinde ne’e, komisaun mós haree daudaun iha tempu udan ladun korreponde atu hala’o eleisaun iha momentu ne’e tanba kondisaun estrada ladi’ak, nune’e ba futuru presiza haree iha tempu oportunu.
Membru CNE ne’e sujere mós ba Governu bainhira realiza eleisaun órgaun suku ba futuru mai, iha territóriu la’o dala-ida de’it tanba haree ba kustu operasionál.
“Eleisaun suku hala’o ona dala-tolu, ita foin daudaun eleisaun iha tinan kotuk no tinan ne’e mai suku 18, tenke armoniza hodi labele iha gastu, hanoin ba futuru eleisaun suku ne’e hala’o dala-ida de’it, kestaun mandatu xefe suku nian atu sai ida de’it,” nia rekomenda.
CNE nota mós eleisaun órgaun suku iha sentru votasaun Vila la uza tinta banhira eleitór sira ezerse diretu votu.
“Observa la uza tinta, tuir loos uza tinta, ne’e bele mosu balun vota dala-rua, hanoin eleisaun hotu nia regra hanesan votu sekretu, mais hanoin sira bele kontrola,” nia tenik.
Iha sorin seluk, Diretór Jerál STAE, Elviro Fernandes Moniz, esplika eleisaun suku nia natureza mak la uza tinta.
“Sentru votasaun hotu-hotu la uza tinta, tanba eleisaun suku nia natureza mak la uza tinta. Ida ne’ebé bazeia ba Lei Suku nian 9/2016 no dekretu Governu númeru 14/2016, ne’ebé la uza tinta no lista votante. Ida-ne’e la’ós buat foun ida, tanba iha eleisaun suku ita sempre halo hanesan ne’e,” nia klarifika.
Enkuantu, iha eleisaun órgaun suku ba postu administrativu Ermera Vila, munisípiu Ermera iha suku tolu mak realiza eleisaun hanesan Poetete, Poetete Vila ho Poetete Lodudu.
Tuir observasaun jornalista Agência Tatoli iha terrenu, nota katak iha sentru votasaun Poetete Villa, eleisaun ne’e hahú iha 09:00 dadeer, ne’ebé hetan partisipasaun másimu husi populasaun sira ne’ebé hahú forma tuir iha liña rua, lori ho kartaun eleitorál bá Asembleia meza hodi rejistu naran hafoin simu voletin votu hodi tama kabina hodi ezerve votu no kontinua tau iha urna ne’ebé ekipa Komisaun Organizadora prepara ona, no tuir oráriu eleisaun ne’e ramata iha tuku 15:00 lokraik hodi kontinua ba kontajen votu.
Iha suku Poetete Vila iha kandidatu na’in-neen hanesan, Ananias Aleixo Martins, Arsenio Amaral, Deometrio Joaquim Trindade, Elidio Salsinha, Luis do Céu Soares no Luis Salsinha Babo mak kompete iha eleisaun órgaun suku refere.
Iha eleisaun ne’e hetan mós supervizaun husi husi Provedoria Direitu Umanu no Justisa (PDHJ, sigla portugés) no hetan apoiu seguransa másimu husi Polísia Nasionál Timor-Leste (PNTL).
Jornalista : Nelson de Sousa
Editora : Julia Chatarina
