ERMERA, 25 janeiru 2025 (TATOLI)—Governu liuhusi Ministériu Administrasaun Estatál (MAE) ho koodenasaun Sekretariadu Tékniku Administrasaun Eleitorál (STAE), sábadu ne’e, realiza eleisaun órgaun suku, ba suku 18 iha munisípiu ualu.
Tanba ne’e, ohin eleitór iha postu administrativu Ermera, munisípiu Ermera husi suku Poetete Vila iha aldeia haat, kompostu husi aldeia Vila ho eleitór 600-resin, aldeia Lekisi 1.460, Rematu 300-resin, aldeia Beluli eleitór 556, partisipa másimu iha prosesu demokrátiku ne’e hodi hili sira-nia líder suku ba mandatu tinan-hitu.
Suku Poetete Vila realiza eleisaun órgaun suku ne’e iha sentru votasaun haat iha kada aldeia.
“Eleisaun ba loron ohin di’ak tebes, ohin hahú iha tuku 07:00 ba preparasaun urna no felleira sira, tuku 09:00, loke urna votu no ramata iha tuku 15:00 lorokraik, iha dadeer eleitór komesa tama ona no agora haree eleitór barak forma liña naruk k,” Delegadu suku, Maria Exposto, informa ba Agência Tatoli, iha sentru votasaun Poetete Vila, suku Poetete Vila, sábadu ne’e.
Notísia relevante : Governu distribui ona materiál eleisaun suku ba munisípiu ualu
Enkuantu, iha eleisaun órgaun suku ba postu administrativu Ermera Vila, munisípiu Ermera, iha suku tolu mak realiza eleisaun hanesan Poetete, Poetete Vila ho Poetete Lodudu.
Tuir observasaun jornalista Agência Tatoli iha terrenu, nota katak, sentru votasaun Poetete Vila, eleisaun ne’e hahú iha tuku 09:00 dadeer, ne’ebé hetan partisipasaun másimu husi populasaun sira, hahú forma iha liña rua, lori ho kartaun eleitorál bá iha Asembleia meza hodi rejistu naran hafoin simu boletin votu hodi tama iha kabina hodi ezerve votu no kontinua tau iha urna ne’ebé ekipa Komisaun organizadora prepara ona.
Iha suku Poetete Vila iha kandidatu na’in-neen hanesan, Ananias Aleixo Martins, Arsenio Amaral, Deometrio Joaquim Trindade, Elidio Salsinha, Luis do Céu Soares no Luis Salsinha Babo, kompete iha eleisaun órgaun suku ne’e.
Eleitór ninia esperansa
Bernadino da Costa, sente kontente tanba bele partisipa iha eventu ne’e hodi hili líder ba órgaun suku.
“Ohin, ami sente kontente tanba ami bele hili ami-nia líder suku. Ami-nia esperansa ba líder suku foun mai atu serbisu hamutuk ho Autoridade postu no munisípiu hodi tau-atensaun ba preokupasaun povu, husi suku ne’e ba infraestrutura báziku hanesan estrada, bee-moos, uma dignu ba povu no seluk tan,” nia espresa.
Nune’e mós, Jeconias Manuel Soares, sente kontente bele mai hili Autoridade suku foun.
“Sente kontente, ohin bele mai partisipa eleisaun hodi hili ami-nia Xefe suku foun, tanba Xefe suku tuan uluk mate ona, entaun difikulta ami mai trata dokumentu balun,’’ nia relata.
Jeconias Manuel Soares husu ba Autoridade suku foun bele hadi’a atendimentu iha suku ba sidadaun sira, hanesan trata dokumentu deklarasaun ruma.
Aleinde ne’e, hanesan joven husu autoridade suku foun atubele promove atividade ba joven sira hanesan jogu komunitáriu, formasaun iha suku no seluk tan hodi kria pás no armonia iha suku laran entre joven sira.
Abitante lokál, Jorgina Babo Santos, hein katak líder komunitáriu foun mai hodi ativu hamutuk ho povu hodi rona preokupasaun povu nian ba asuntu infraestrutura báziku, idozu, faluk, defisiénsia hodi transmite ba Autoridade postu no suku hodi bele hetan atensaun husi Governu.
Eleisaun ne’e hetan supervizaun husi husi Komisaun Nasionál Eleisaun (CNE, sigla portugés), Provedoria Direitu Umanu no Justisa (PDHJ, sigla portugés) no apoiu seguransa másimu husi Polísia Nasionál Timor-Leste (PNTL).
Jornalista : Nelson de Sousa
Editora : Julia Chatarina
