DILI, 25 Janeiru 2025 (TATOLI) – Diretór Sekretariadu Tékniku Administrasaun Eleitorál (STAE) munisípiu Lautém, Sérgio Belmonte, informa rezultadu eleisaun órgaun suku iha Baduro, postu administrativu Lautém, kandidatu Faustino Dias de Almeida provizoriamente hetan votu maioria hamutuk 365.
Dirijente STAE ne’e esplika katak eleisaun suku nia prosesu tuir lei no kada sentru votasaun hahú loke iha tuku 07h00 dadeer hodi forma meza no votasaun hahú iha tuku 09h00 no taka iha tuku 15h00.
Depoizde ramata sufrájiu ne’e, ekipa halo kontajen votu ba kandidatu na’in-tolu ne’ebé hahú iha tuku 15h00 to’o 15h30. Rezultadu provizóriu hatudu kandidatu xefe suku Faustino Dias de Almeida ho votu maioria 365, Inácio Paulo Fernandes Monteiro 98 no Paulo dos Santos Dias 145.
“Rezultadu ohin ne’e provizóriu hela, hein aban tuku 09h00 ita sei halo apuramentu finál hodi hatene rezultadu finál ba manán-na’in husi kandidatu na’in-tolu ne’e”, Sérgio Belmonte informa ba Tatoli via telefone, ohin.
Nia haktuir katak durante prosesu eleisaun husi dadeer to’o ramata iha lorokraik laiha provokasaun ruma, situasaun la’o hakmatek, tanba hetan seguransa másima husi Polísia munisípiu Lautém.
Eleisaun órgaun suku iha Baduro iha estasaun lima mak ida iha sede aldeia Tamaro nian no haat hamutuk iha Eskola Bázika Filiál Baduro.
Eleisaun suku iha Baduro ne’e iha estasaun lima mak ida iha sede aldeia Tamaro no estasaun haat hamutuk iha Eskola Bázika Filiál (EBF) Baduro.
Baduro iha aldeia lima mak Tamaro, Irapala, Laclo-Mano, Luadau no Malae-Lada ho nia totál eleitór hamutuk 949.
Lembra katak eleisaun ba Asembleia Aldeia no Konsellu Suku realiza ohin iha suku 18 iha munisípiu Aileu, Baucau, Ermera, Manufahi, Manatuto, Viqueque, Lautém no Oé-Cusse.
Eleitór sira hili xefe suku na’in-18, xefe aldeia sia, delegadu konsellu suku 18, lia-na’in 14 no reprezentante juventude ba konsellu suku 28.
Notisia relevante: Kandidatu na’in-tolu kompete iha eleisaun órgaun suku iha Baduro
Jornalista: Arminda Fonseca
Editora: Maria Auxiliadora
