DILI, 25 Janeiru 2025 (TATOLI) – Suku Baduro, postu administrativu Lautém, munisípiu Lautém, iha kandidatu xefe suku na’in-tolu ne’ebé kompete iha eleisaun suku, ne’ebé realiza ohin.
Baduro iha aldeia lima mak Tamaro, Irapala, Laclo-Mano, Luadau no Malae-Lada ho nia totál eleitór hamutuk 949.
Diretór Sekretariadu Tékniku Administrasaun Eleitorál (STAE) munisípiu Lautém, Sérgio Belmonte, informa kandidatu na’in-tolu ne’ebé kompete mak Faustino Dias de Almeida, Inácio Paulo Fernandes Monteiro no Paulo dos Santos Dias.
“Situasaun iha terrenu, iha sentru votasaun Baduro ninian eleisaun hahú tuku 09h00 no ramata iha tuku 15h00. Hotu ita kontinua halo kontajen de votu”, Sérgio Belmonte adianta ba Tatoli via telefone, ohin.
Nia haktuir katak eleisaun órgaun suku iha Baduro ne’e iha estasaun lima mak ida iha sede aldeia Tamaro no estasaun haat hamutuk iha Eskola Bázika Filiál (EBF) Baduro. “Daudaun votante sira balun hahú forma ona bá vota,” nia dehan.
Lembra katak eleisaun ba Asembleia Aldeia no Konsellu Suku komesa ohin iha suku 18 iha munisípiu Aileu, Ermera, Manufahi, Baucau, Manatuto, Viqueque, Lautém no Oé-Cusse.
Eleitór sira sei hili xefe suku na’in-18, xefe aldeia sia, delegadu konsellu suku 18, lia-na’in 14 no reprezentante juventude ba konsellu suku 28.
Notisia relevante: Governu distribui ona materiál eleisaun suku ba munisípiu ualu
Jornalista: Arminda Fonseca
Editora: Maria Auxiliadora
