DILI, 25 Janeiru 2025 (TATOLI) – Prezidente Repúblika, José Ramos Horta, esplika katak atuál Diretór Nasionál Servisu Intelijénsia (SNI), Longuinhos Rabindranatha Tagore Domingues de Castro Monteiro, hetan tratamentu iha Jakarta tanba moras fuan.
Horta haktuir, Longuinhos viajen ba tratamentu iha Indonézia ho aviaun espesiál ne’ebé gratuita no ospitál gratuita, laós Governu mak selu.
“Longinhos Monteiro, ha’u-nia amigu sira iha Indonézia mak lori aviaun mai tula no ha’u ba nia fatin dala tolu iha ICU. Aviaun espesiál husi Indonézia mak mai tula gratuita no ospitál mós gratuita. Governu la selu duit metan ida, mezmu Governu iha obrigasaun atu selu, maibé dalaruma desizaun kleur tebetebes”, Prezidente Repúblika José Ramos Horta, hatete iha Aeroporto Internasionál Nicolau Lobato, Comoro, Dili, sábadu ne’e.
Relembra katak Longuinho antes transporta ba rai-liur, hetan ona tratamentu iha Ospitál Nasionál Guido Valadares (HNGV, sigla portugés).
Diretór Apoiu Diagnóstiku no Terapeútiku (DAT) Hospital Nacional Guido Valadares (HNGV), Vidal de Jesus Lopes, hateten eis ministru interiór no atuál diretór Servisu Nasionál Intelejénsia (SNI), Longuinhos Monteiro, oras ne’e hala’o hela tratamentu saúde iha Indonézia tanba moras fuan.
Notísia relevante : Sofre kurasaun, Longuinhos Monteiro halo tratamentu saúde iha Indonézia
Jornalista :Osória Marques
Editór : Zezito Silva
