Autoridade Uatulari enserra eleisaun órgaun suku iha Macadique de Baixo
VIQUEQUE, 26 janeiru 2025 (TATOLI)—Administradór postu administradór Uatulari, munisípiu Viqueque, domingu ne’e, enserra eleisaun órgaun suku, ne’ebé realiza iha suku Macadique de Baixo.
Administradór postu Uatulari, Jorgé Ribeiro, haktuir, rezultadu apuramentu iha meza asembleia suku Macadique de Baixo ramata ona, ho rezultadu kandidatu Rogeiro da Silva hanesan kandidatu úniku ne’ebé liu ona barreira hodi lidera suku.
“Ita-nia Xefe suku eleitu ba suku Macadique de Baixo, ita hotu orgullu no kontente. Husi rezultadu votasaun kada sentru votasaun hitu iha Macadique de Baixo eleitór partisipa votasaun hamutuk 1.027, votu nulu sia, votu branku ida no votu válidu hamutuk 1.017,” Jorge Ribeiro, hateten iha sede suku Macadique de Baixo.
Notísia relevante : Governu lansa suku foun tolu iha Uatolari Viqueque
Biban ne’e, Autoridade postu husu ba komunidade lokál ba oin nafatin fó apoiu ba Autoridade suku eleitu atubele dezenvolve suku.
“Atu lori suku ida-ne’e la’o ba oin. Ita hili ita-nia xefe suku, maibé bainhira nia la hetan apoiu, oinsá mak ita dezenvolve ita-nia suku. Suku ida-ne’e eziste nu’udar suku foun, nune’e ba oin sei hasoru difikuldade barak. Tanba ne’e komunidade nafatin kolobora hamutuk ho xefe suku eleitu hodi lori suku ida-ne’e,” nia akresenta.
Nia dehan, autoridade postu Uatulari sei apoiu Xefe suku eleitu bainhira hasoru difikudade ruma, liuliu ba materiál serbisu iha suku nian.
“Ha’u husu ba xefe eleitu bainhira haosoru difikuldade ruma bele konsulta ho ha’u atu ha’u bele ajuda tanba ne’e suku foun, ita presiza apoiu malu. Nune’e mós nia husu ba Ministériu Administrsaun Estatál (MAE) iha serimónia pose ba Xefe suku eleitu tenke reliza iha suku atu komunidade bele asiste hamutuk, labele fó pose iha fali fatin seluk. Entaun, ita-nia komunidade la partisipa. Tanba ne’e, maka ha’u husu ba parte hotu atu tau ba konsiderasaun,” Autoridade postu hato’o.
Notísia relevante : CNE-STAE observa eleisaun suku foun iha Uatulari la’o hakmatek
Iha fatin hanesan Diretór Sekretáriu Tékiniku Administrasaun Eletorál (STAE) munisípiu Viqueque, Humberto Fernades, agradese ba komunidade iha suku Macadique de Baixo inklui Polísi Nasionál Timor-Leste (PNTL), ne’ebé kontribui maka’as durante festa demokrasia to’o la’o h susesu.
“Ohin sai loron ikus ba eleisaun iha suku Macadique de Baixo, eleisaun ne’ebé la’o ho di’ak no transparánsia tuir, ho demokrasia,” nia apresia.
Tuir dadus eleitór husi suku Macadique de Baixo hamutuk 1.625 (163%), ho totál aldeia hitu, kompostu husi aldeia Betulari eleitór hamutuk 350 (35%) kompostu husi mane 167 no feto 183, enkuantu aldeia Gomioru ho totál 227 (23%) kompostu husi mane 106 no feto 121.
Aldeia Koquilako ho totál eleitór 141 (14%) kompostu husi mane 57 no feto 64, aldeia Lacarate iha eleitór hamutuk 212 (21%) kompostu husi mane 100 no feto 112, aldeia Lau-Uma ho totál eleitór 236 (24%) kompostu husi mane 116 feto 120, aldeia Lutugia ho totál eleitór 229 (23%) kompostu husi mane 118 no feto 111, aldeia Ossolari ho totál eleitór 230 (23%) kompostu husi mane 107 no feto 123
Serimónia enserra eleisaun komunitária ne’ebé realiza iha postu Uatulari hetan partisipasaun husi Komisáriu Nasionál Eleisaun (CNE, sigla portugés), Autoridadade lokál, inklui komunidade suku Macadique de Baixo.
Jornalista : Vitorino Lopes da Costa
Editór : Cancio Ximenes
