VIQUEQUE, 25 dezembru 2025 (TATOLI)—Komisaun Nasionál Eleisaun (CNE, sigla portugés) no Sekretáriadu Tékniku Administrasaun Eleitorál (STAE), sabadu ne’e, observa direta eleisaun suku foun iha sentru votasaun sira iha suku Macadique de Baixo no Macadique Uaitame iha postu administrativu Uatulari, munisípiu Viaueque, ne’e la’o ho hakmatek.
Notísia Relevante: STAE Viqueque distribui ona materiál sensitivu ba sentru votasaun
Komisáriu Komisaun Nasionál Eleisaun (CNE) destakadu iha Viqueque, Olavio da Costa Monteiro Almeida, informa observasaun direta iha sentru votasaun iha dadeersan ne’e liuliu sentru votasaun Betulari, suku Macadique de Baixo, iha postu Uatualari, munisípiu Viqueque ne’e eleitór sira entuziasmu tuir eleisaun.
“Ohin, komunidade suku rua partisipa eleisaun suku, ita haree komunidade entusizamu tebes partisipa iha eleisaun. Iha sentru votasaun, parte dadeersaan ne’e, komunidade partisipa eleisaun ho hakmatek, laiha problema akontese iha suku laran liuliu iha sentru votasaun sira,” Olavio da Costa Monteiro Almeida hateten ba jornlista sira, iha sentru votasaun Belula, ohin.
Tuir nia observasaun, lomunidade kontribui tebes eleisaun ida-ne’e, tanba ne’e nia hato’o agradesimentu ba Ministériu Administrasaun Estatal (MAE) ne’ebé fó oportunidade ba autoridade sira hodi avansa suku foun rua Macadique de Baixo no Macadique Uaitame, ne’ebé agora daudaun ne’e realiza eleisaun.
“Prosesu eleisaun kontroladu. Hahú husi dadersaan ne’e, ita seidauk identifika irregularidade ruma, ita hein to’o eleisaun ramata,” nia dehan.
Nia relata, iha dadeersaan ne’e eleitór husi suku Macadique de Baixo, aldeia Betulari 80% mak ezerse ona sira-nia direitu votu iha sentru votasaun hodi hili lideransa suku ne’ebé sira fihir no hakarak.
Diretór Sekretáriadu Tékniku Administraun Eletoral (STAE), Humberto Fernandes, haktuir hahú husi horisehik halo distribuisaun materiál eleisaun to’o mai agora, realizasaun eleisaun iha suku foun rua ne’e la’o iha situasaun hakmatek.
“Eleisaun ohin, ita hahú iha tuku 9h00 dadeersan no ita sei termina eleisaun iha tuku 15h00 lorokraik. Ita haree eleitór sira partisipa eleisaun másimu tebe-tebes. Komunidade sente orgullu partisipa eleisaun,” nia realsa.
Iha fatin seluk, eleitór husi aldeia Kokilaku, Nicolao Nano Metan, sente orgullu partisipa eleisaun hodi hili xefe suku atu lidera suku Macadique de Baixo.
“Ha’u sente orgullu partisipa iha eleisaun ba xefe suku nian. Nune’e, ohin, ha’u ezerse ha’u-nia diretu iha tuku 09h00 dadeersa. Ha’u espera ho ezisténsia suku foun ne’e, ami bele haree dezenvolvimentu la’o ba oin,” nia hateten.
Tuir observasaun jornalista Agência TATOLI iha sentru votasaun nota katak, komunidade hahú marka prezensa iha sentru votasaun ne’e iha tuku 07h00 dadeersan no bainhira to’o iha tuku 09h00 dadeer ne’e, sira hakat hakbesik ba meza hodi simu bulletin votu atu ezerse sira-nia direitu votu ho responsabilidade.
Enkuantu, situasaun jerál iha sentru votasaun la’o hakmatek tanba hetan seguransa másimu husi membru Polísia Nasionál Timor Leste (PNTL) na’in-tolu ne’ebé komandu PNTL koloka ba kada sentru votasaun.
Tuir dadus, suku Macadique Uaitame nia aldeia hamutuk neen (6) kompostu husi aldeia Bubulita ne’e eleitór mane 115 no feto 124 ho totál eleitór hamutuk 239 (24%); Borubai iha eletór mane 46 no feto 49 ho totál eleitór hamutuk 95 (10%); Digamasi iha eleitór mane 34 no feto 44 ho totál eleitór hamutuk 95 (8%).
Aldeia Luruboru iha eletór mane 68 no feto 75 ho totál eleitór hamutuk 143 (14%); Matadalan iha eleitór mane 22 no feto 33 ho totál eleitór hamutuk 55 (6%); Queturai iha eleitór mane 37 no feto 40 ho totál eleitór 77 (8%) ho totál eleitór hamutuk 688.
Entretantu, suku Macadique De Baixo nia aldeia hamutuk hitu (7) ne’ebé kompostu husi aldeia Betulari iha eleitór mane 167 no feto 183 ho totál eleitór hamutuk 350 (35%); Gomioru iha eleitór mane 106 no feto 121 ho totál eleitór 227 (23%); Koquilako iha eleitór mane 57 no feto 64 ho totál eleitór hamutuk 141 (14%).
Aldeia Lacarate iha eleitór mane 100 no feto 112 ho totál eleitór 212 (21%); Lau-Uma iha eleitór mane 116 no feto 120 ho totál eleitór 236 (24%); Lutugia iha eleitór mane 118 no feto 111 ho totál eleitór hamutuk 229 (23%); Ossolari iha eleitór mane 107 no feto 123 ho totál eleitór hamutuk 230 (23%), ne’ebé totál eleitór iha suku rua ne’e hamutuk 1.625 (163%).
Notísia Relevante: 25 janeiru: STAE Viqueque realiza eleisaun ba suku foun rua iha Uatulari
Jornalista : Vitorino Lopes da Costa
Editór : Cancio Ximenes
