VIQUEQUE, 24 janeiru 2025 (TATOLI)—Sekretariadu Tékniku Administrasaun Eleitorál (STAE) Viqueque aervisu hamutuk ho autoridade munisipál, STAE, CNE no parte PNTL, sesta ne’e, distribui ona materiál sensitivu eleisaun nian iha sentru votasaun 13 iha suku Macadique Uaitame no Macdique de Baixo, iha postu Uatulari.
Notísia Relevante: 25 janeiru: STAE Viqueque realiza eleisaun ba suku foun rua iha Uatulari
“Ohin, ami parte autoridade munisípiu hamutuk ho STAE, CNE no Polísia Nasionál Timor-Leste (PNTL) distribui ona materiál ba eleisaun suku nian ba kada sentru votasaun sira, atu nune’e aban (sábadu, 25/01) eleitór sira ezerse sira-nia diretu votu hodi hili lideransa suku. Iha distribuisaun materiál ne’e la’o ho di’ak no la hetan asidente ruma,” Diretór Servisu Munisipál Apoia Organizasaun Naun Govermental no Organizasaun Komunitáriu, Cosme Sarmento, hateten ba Agência TATOLI, iha postu Uatulari, hafoin ramata distribui materiál eleisaun iha suku Macadique Uaitame, ohin.
Nia hateten, oráriu eleisaun ba sábadu (25.01) aban ne’e hahú tuku 07h00 dadeer hodi prepara meza no iha tuku 09h00 dadeer ne’e eleitór sira hahú halo votasaun iha suku foun ne’e.
“Parte dadeersan prepara fatin eleisaun no oras votasaun ne’e, ita sei hahú tuku 09h00 sei ramata tuku 15h00 lorokraik no kontinua halo kontajen votu,” nia dehan.
Diretór CNE munisípiu Viqueque, Honorio da Cruz, hatutan prosesu eleisaun ba suku foun Macadique de Baixo no Macadique Uaitame ne’e, parte CNE mós koloka ninia funsionáriu sira hodi akompaña prosesu eleisaun ne’e.
“Daudaun ne’e, ami koloka hela ita-nia funsionáriu iha kada sentru votasaun sira hodi akompaña prosesu eleisaun ne’e,” nia hateten.
Nia dehan, sábadu (25/01) aban, tuir oráriu votasaun ne’e sei taka iha tuku 15h00 lorokraik no kontinua kedas ho kontajen votu iha kada sentru votasaun, fahoin sei hatutan ho kotajen votu ba suku foun ba kada suku ida-idak nian,
Fatin ne’ebé hili sai fatin ba kontajen ikus ba suku foun rua ne’e mak ba suku Macadique Uaitame ne’e sei hala’o iha aldeia Luruboru no suku Macadique de Baixo sei hala’o iha aldeia Betulari, hafoin rezulatdu ikus ne’e maks ei lori ba postu Uatulari no lori ba munisípiu.
Tuir observasaun jornalista Agência Tatoli nota katak distribuisaun materiál sensitivu ne’e hetan akompañamentu husi parte PNTL, autotidade lokál, STAE no CNE.
Materiál sensitivu no la’ós sensitivu sai husi munisípiu Viqueque to’o iha postu Uatulari iha tuku 11h21, no atu asegura eleisaun suku foun rua iha Uatulari ne’e, PNTL Viqueque destaka membru PNTL na’in-tolu (3) iha kada sentru votasaun ida.
Material eleisaun sensitivu ne’e hamutuk folla 2.500, no urna hamutuk 26 ne’ebé fahe ba kada sentru votasaun ida iha urna rua (2).
Tuir dadus, suku Macadique Uaitame nia aldeia hamutuk neen (6) kompostu husi aldeia Bubulita ne’e eleitór mane 115 no feto 124 ho totál eleitór hamutuk 239 (24%); Borubai iha eletór mane 46 no feto 49 ho totál eleitór hamutuk 95 (10%); Digamasi iha eleitór mane 34 no feto 44 ho totál eleitór hamutuk 95 (8%).
Aldeia Luruboru iha eletór mane 68 no feto 75 ho totál eleitór hamutuk 143 (14%); Matadalan iha eleitór mane 22 no feto 33 ho totál eleitór hamutuk 55 (6%); Queturai iha eleitór mane 37 no feto 40 ho totál eleitór 77 (8%) ho totál eleitór hamutuk 688.
Entretantu, suku Macadique De Baixo nia aldeia hamutuk hitu (7) ne’ebé kompostu husi aldeia Betulari iha eleitór mane 167 no feto 183 ho totál eleitór hamutuk 350 (35%); Gomioru iha eleitór mane 106 no feto 121 ho totál eleitór 227 (23%); Koquilako iha eleitór mane 57 no feto 64 ho totál eleitór hamutuk 141 (14%).
Aldeia Lacarate iha eleitór mane 100 no feto 112 ho totál eleitór 212 (21%); Lau-Uma iha eleitór mane 116 no feto 120 ho totál eleitór 236 (24%); Lutugia iha eleitór mane 118 no feto 111 ho totál eleitór hamutuk 229 (23%); Ossolari iha eleitór mane 107 no feto 123 ho totál eleitór hamutuk 230 (23%), ne’ebé totál eleitór iha suku rua ne’e hamutuk 1.625 (163%).
Notísia Relevante: PNTL Viqueque sei asegura eleisaun suku foun iha Uatulari
Jornalista : Vitorino Lopes da Costa
Editór : Cancio Ximenes