ERMERA, 26 janeiru 2025 (TATOLI)—Kandidatu Arsenio Amaral ho númeru sorteiru 2 no Luís Salsinha Babo 6, avansa ba eleisaun órgaun suku ba segunda volta, iha suku Poetete Vila, postu administrativu Ermera Vila, munisípiu Ermera.
Iha suku Poetete Villa iha kandidatu na’in-neen mak kompete iha eleisaun órgaun suku, kompostu husi Ananias Aleixo Martins ho númeru sorteiru (1) Arsénio Amaral (2), Deométrio Joaquim Trindade (3), Elídio Salsinha (4), Luis do Céu Soares (5) no Luís Salsinha Babo (6).
Tuir rezultadu votasaun kandidatu Arsénio Amaral hetan votu 710, Ananias Aleixo Martins hetan votu 255, Deomeétrio Joaquim Trindade ho votu 199, Elídio Salsinha ho votu 41, Luís do Céu Soares hetan votu 80, Luís Salsinha Babo ho votu 361, enkuantu iha votu branku rua no nulu hitu.
Notísia relevante : Eleitór Poetete Vila partisipa másimu iha eleisaun órgaun suku
Iha suku Poetete Vila iha eleisaun órgaun suku ne’e iha sentru votasaun haat ne’ebé destaka iha aldeia haat hanesan Vila, Lekisi, Rematu no Beluli.
“Daudaun iha hela apuramentu no ida-ne’e mak rezultadu provizóriu, iha suku Poetete Vila, iha kandidatu na’in-rua mak avansa fali ba eleisaun segunda ronda, tanba kandidatu númeru sorteiru 2 manán la ho maioria absoluta ho de’it votu 710, nune’e tuir lei avansa ba ronde daruak,” Diretora Sekretariadu Tékniku Administrasaun Eleitorál (STAE) munisípiu Ermera, Romenia madeira ferreira, informa ba Agência Tatoli, via telefónika, domingu ne’e.
Nia fó sai tuir kalendáriu eleisaun ronde daruak ne’e sei realiza iha 10 fevereiru tinan ne’e.
Iha eleisaun ne’e hetan supervizaun husi Komisaun Nasionál Eleisaun (CNE, sigla portugés), Provedoria Direitu Umanu no Justisa (PDHJ, sigla portugés), no hetan apoiu seguransa másimu husi Polísia Nasionál Timor-Leste (PNTL).
Jornalista : Nelson de Sousa
Editora : Julia Chatarina
