VIQUEQUE, 26 janeiru 2025 (TATOLI)–Xefe suku eleitu husi Macadique Uaitame, postu administrativu Uatulari, munisípiu Viqueque, José Pinto Soares, informa, nia parte sei tau prioridade ba estrada, eletrisidade no bee-moos ne’ebé durante ne’e komunidade iha suku ne’e sempre preokupa.
Suku foun Macadique Uaitame iha postu administrativu Uatulari lokaliza foho Matebian, kompostu husi aldeia neen.
“Iha ha’u-nia mandatu ida-ne’e, dauluk ha’u sei hamutuk ho komunidade atu forma uluk estrutura suku. Depois ami hahú tau prioridade tolu hanesan estrada, eletrisidade no bee-moos, ne’ebé sai prioridade mós ba komunidade ne’ebé moris iha área ne’ebá,” José Pinto Soares, informa ba Agência Tatoli, iha suku Macadique Uaitame.
Notísia relevante : CNE-STAE observa eleisaun suku foun iha Uatulari la’o hakmatek
Xefe suku eleitu dehan, estrada liga bá suku Macadique Uaitame daudaun ne’e difikulta komunidade nia movimentu hodi lori sira-nia produtu lokál ba merkadu.
“Ami esforsu ba estrada, estrada iha tiha maka ami hanoin programa sira seluk. Se estrada maka laiha ami sei la halo buat ida. Tanba ne’e, maka estrada sai ami-nia prioridade primeiru, daruak maka bee-moos tanba komunidade balun difísil asesu bee-moos,” nia akresenta.
Suku Macadique Uaitame iha aldeia lima mak to’o agora seidauk asesu ba eletrisidade, nune’e sai difikuldade ba estudante sira ne’ebé estuda iha tempu kalan.
“Iha ami-nia aldeia lima hanesan Bubulita, Digamasi, Burubai, Luruboru no Keturai maka seidauk asesu ba ahi eletrisidade, ne’ebé ba ha’u-nia mandatu sei esforsu hodi halo pedidu ba Governu no Eletrisidade de Timor Leste, Empreza Públika (EDTL, E.P) dada ahi eletrisidade ba komunidade,” nia tenik.
Autoridade suku ne’e dehan, durante mandatu, nia sei kolabora ho komunidade husi aldeia neen, veteranu no joven hodi dezenvolve suku referida.
Tuir dadus totál eleitór husi suku Madique Uaitame hamutuk 688, kompostu husi aldeia neen hanesan aldeia Bubulita ho eleitór 239 (24%) kompostu husi mane 115 no feto 124, aldeia Borubai ho eleitór 95 (10%) kompostu husi mane 46 no feto 49, aldeia Digamasi ho totál eleitór 95 (8%) kompostu husi mane 34 no feto 44.
Aldeia Luruboru ho eleitór 143 (14%) kompostu husi mane 68 no feto 75, aldeia Matadalan ho eleitór 55 (6%) kompostu husi mane 22 no feto 33 no aldeia Queturai ho eleitór 77 (8%) kompostu husi mane 37 no feto 40.
Jornalista : Vitorino Lopes da Costa
Editór : Cancio Ximenes
