Negosiante Uatulari preokupa eletrisidade mate-lakan
VIQUEQUE, 27 janeiru 2025 (TATOLI)—Negosiante husi suku Matahoi, postu administrativu Uatulari, munisípiu Viqueque, António dos Santos, preokupa ho eletrisidade ne’ebé mate-lakan fó impaktu ba negosiante sira hodi buka moris liuhusi atividade negósiu loro-loron.
Notísia Relevante: PAM Viqueque husu EDTL, E.P kontrola eletrisidade mate-lakan
“Ami, negosiante sira iha postu Uatulari durante ne’e ami preokupa liu ba eletrisidade ne’ebé mak mate-lakan hanesan agora daudaun iha dadersaan tuku 11h00 to’o agora tuku 21h00 kalan lakan tiha pois mate fali ona. Iha ne’e, dalaruma to’o lorokraik no kalan mak foin lakan fila-fali. Entaun, sasán sira-ne’ebé ami rai iha jelera laran ne’e sai aat hanesan ayam potong, ikan no sosis sai dodok tanba ahi mate, ami lakon osan ne’ebé ami sosa,” Nia hateten ba jornalista sira, iha postu Uatulari, ohin.
Negosiante ne’e hatutan, dever komunidade nian sosa ona pulsa eletrisidade hodi karrega ba kontadór maibé eletrisidade avaria beibeik ne’e mak bele empata atividade negósiu nian no labarik sira hodi estuda.
“Ami-nia dever mak sosa pulsa, ami sosa hanesan negosiante ne’e ami sosa pulsa ne’e dalaruma $10 toó $20. Maibé ahi mate hela de’it, ami la hatene kauza iha ne’ebé,” nia akresneta.
Nia dehan, eletrisidade mate-lakan ne’e fó impaktu ba sasán sira hanesan jelera aat lalais de’it, no bainhira aat mak negosiante sira tenke sosa fila-fali hodi rai iha kioske laran.
“Eletrisidade ne’ebé mate-lakan ne’e estraga ona ha’u-nia jelera hamutuk haat mak aat ona. Nune’e, ahi ne’ebé mate beibeik, ami hato’o ba tékniku Eletrisidade de Timor Leste, Empreza Públika (EDTL, E.P) postu Uatulari maibé ahi kontinua mate,” nia dehan.
Tanba ne’e, nia husu, EDTL, E.P atu tau atensaun ba eletrisidade ho másimu no responsabiliddae, nune’e eletrsidade labele mate beibeik hodi labele estraga negosiante sira-nia sasán eletrónika sira.
“Ami-nia hakarak mak eletrisidade labele mate beibeik, atu labele estraga ami-nia sasán hodi ami buka moris. Tanba presu jelera ne’ebé ha’u sosa balun folin $350 no balun sosa $400, maibé agora sai aat ami lakon boot,” nia hateten.
Iha fatin seluk, xefe suku Matahoi, António Amaral, hateten durante ne’e nia akompaña eletrisidade iha postu Uatulari mate beibeik, entaun ninia impaktu mak estraga komunidade no negosiante sira-nia sasán eletróniku sira.
“Eletrisidade ne’ebé iha postu Uatulari mate-lakan ne’e, ita-nia komunidade no negosiante sira hato’o beibeik ba ha’u. Ha’u relata ba tékniku EDTL, E.P sira, maibé to’o agora loro-loron ahi kontinua mate-lakan hela, ne’ebé kauza ba ita-nia negosiante sira-nia sasán hanesan jelera, televizaun sira estraga hotu. Tanba ne’e, ha’u husu Prezidente EDTL, E.P atu oriente tékniku sira hodi kontrola eletrisidade atu labele mate-lakan,” nia sujere.
Tuir dadus, abitante postu administrativu Uatulari hamutuk 4.566 ho totál suku hamutuk ualu (8) no totál aldeia hamutuk 63.
Jornalista : Vitorino Lopes da Costa
Editór : Cancio Ximenes
