TL tenke implementa Sistema Saúde Dijitál atu hafásil servisu saúde
DILI, 27 janeiru 2025 (TATOLI)—Koordenadór Dezenvolvimentu Polítika Públika Estratéjika iha Prezidénsia Konsellu Ministru, André Monteiro, informa Timor-Leste (TL) tenke implementa Sistema Saúde Dijitál nune’e atu hafásil servisu saúde iha ospitál sira.
“Saúde dijitál ita presiza implementa, nune’e bele ajuda pasiente sira, tanba iha nasaun seluk saúde dijitál ema implementa ona, maibé iha Timor-Leste ita sei uza manuál. Entaun, saúde dijitál kria atubele haforsa servisu saúde sira-ne’e ho lais,” André Monteiro dehan ba TATOLI iha nia kna’ar fatin, Palácio do Governo, segunda ne’e.
Nia afirma, servisu saúde barak mak seidauk organizadu ho di’ak, tanba sei uza sistema manuál, ezemplu, médiku ida atu rejistu hodi fó konsulta ba pasiente ida-ne’ebé maihusi fatin dook, iha-ne’ebé hahú hein iha HNGV tuku 05:00 madrugada Otl, depois mai hein to’o oras servisu mak bele rejistu, entaun ida-ne’e mak halo atendimentu ba ema ne’e tarde.
“Programa Governu nian iha prinsípiu ida katak lalais, efisiénsia no kualidade iha área saúde. Agora, ita-nia atendimentu tarde no mós ladún efisiente, entaun ho hanoin ida-ne’e mak husi parte ami-nia Gabinete Prezidénsia Konsellu Ministru atu servisu kolabora ho Ministériu Saúde, nune’e bele implementa Sistema Saúde Dijitál,” nia relata.
Notísia relevante: OMS: Saúde dijitál mak hadia kualidade servisu saúde ba ema
Nia haktuir, bainhira implementa saúde dijitál ida-ne’e, atu pasiente sira konsulta bele liuhusi telemóvel halo apontamentu no atu hasoru médiku sé, ezemplu, atu hasoru médiku internista ka pediatria, iha-ne’ebá sistema sei fó oras.
André informa katak sistema dijitál nia benefísiu mak bainhira médiku estranjeiru ida atu konsulta pasiente, maibé nia letra dada de’it halo konfuzaun, depois nia kontratu hotu nia fila ona, depois loron ruma ninia asinatura ne’e sai problema no lori bá tribunál, sistema ne’e bele deteta no istória klínika ne’e mós iha.
Sistema ne’e, tuir nia, atu ajuda mós funsionáriu sira servisu ho disiplina liután, liuliu médiku ida nia rezultadu servisu ohin loron ne’e konsulta ema na’in hira, iha-ne’ebá sistema bele fó sai hotu.
“Sistema ne’e nia benefísiu mak ita bele deteta funsionáriu sira-nia avaliasaun dezempeña tanba iha futuru sei aplika remunerasaun ba dezempeñu,” nia esklarese.
Atu garante Sistema Saúde Dijitál nia funsionamentu, presiza internet di’ak. Fibra Ótika bainhira konkretizada, fásil ona atu uza sistema referidu.
Antes ne’e, iha 22 janeiru 2025, Ministru Prezidénsia Konsellu Ministru, Agio Pereira, no Koordenadór hosi Gabinete Dezenvolvimentu Polítika Públika Estratéjika, André Monteiro, halo aprezentasaun ida kona-ba Saúde Dijitál iha reuniaun Konsellu Ministru.
Saúde Dijitál, ka e-saúde, mak aplikasaun teknolojia informasaun no komunikasaun nian iha área saúde. Organizasaun Mundiál Saúde (OMS) define Saúde Dijitál hanesan téknika, pratika no atitude lubun ida-ne’ebé kontribui ba efisiénsia sistema saúde nian.
Introdusaun ba sistema saúde dijitál iha Timor-Leste bele lori vantajen signifikativu oinoin, inklui transformasaun ba prosesu manuál sira ne’ebé lori tempu naruk sai solusaun dijitál ne’ebé intelijente. Sistema ida-ne’e permite implementasaun rejistu klíniku eletróniku sentralizadu, hodi garante asesu no sinkronizasaun dadus iha tempu reál, promove efisiénsia, modernizasaun no hadi’a kualidade servisu saúde ne’ebé fornese ba populasaun.
Jornalista: Felicidade Ximenes
Editór: Xisto Freitas da Piedade
