iklan

NASIONÁL, HEADLINE

Traballadór timoroan iha Koreia Súl apoia boxista Delio no Daniel

Traballadór timoroan iha Koreia Súl apoia boxista Delio no Daniel

Boxista Delio Mouzinho no Daniel de Asis Belo (hamriik klaran) husi El-Matadór Boxe sei kompete iha eventu Holywings Sport Show (HSS) Bali, Indonézia, iha 09 fevereiru 2025. Imajen espesiál

DILI, 27 janeiru 2025 (TATOLI)—Sindikatu traballadór Ermera-oan iha Koreia Súl apoia finanseira ho valór $461.00 ba boxista Delio Mouzinho no Daniel de Asis Belo ne’ebé sei kompete iha eventu Holywings Sport Show (HSS) ne’ebé sei hala’o iha Bali, Indonézia, 09 fevereiru 2025.

“Ami Sindikatu Traballadór Ermera iha Korea Súl, ami hakarak kontribui finansiamentu tuir ami-nia kbi’it hodi apoiu boxista Delio no Daniel nune’e bele reprezenta Timor-Leste iha kompetisaun iha Bali,” responsável Sindikatu Traballadór Ermera-oan iha Koreia Súl, Victor Tilman Vicky, ba Tatoli, via whatsapp, segunda ne’e.

Vicky hateten orsamentu ne’e ho objetivu atu ajuda boxista sira sira-nia preparasaun hodibele hala’o prestasaun di’ak liután iha kompetisaun lori Timor-Leste bá mundu.

“Ita ki’ak ho ki’ak mak ajuda malu. Tanba ne’e, ita hola inisiativa sira-ne’e hodi reprezenta ita hotu, nune’e ita hatudu ba mundu katak Timor bele kompete,” nia afirma.

Notísia relevante: Boxista Delio Mouzinho-Daniel Belo sei kompete iha eventu HSS Bali

Iha parte seluk, Delio Mouzinho nu’udár boxista ida, sente agradese ba apoiu referidu tanba maski apoiu ne’e simples maibé valór boot liu ne’ebé bele motiva no promove talentu timoroan sira-nian.

“Primeiru, ha’u hakarak agradese ba traballadór timoroan sira iha Koreia Súl. Apoiu ne’e maski simples, maibé valór boot. Apoiu ne’ebé iha bele fanun mós timoroan sira seluk iha diáspora ne’ebé iha nasionalizmu iha sira-nia fuan no apoia talentu timoroan sira,” boxista ne’e tenik.

Boxista na’in rua ne’e husi klube El-Matadór no klube referidu hetan konvite direta husi komisaun organizadora Holywings Sport Show (HSS) iha Bali, Indonézia, nune’e tau konfiansa ba boxista na’in-rua ne’e hodi partisipa.

Antes ne’e, Prezidente klube Boxe El-Matadór no treinadór, Abílio Orlando dos Santos, hateten boxista na’in-rua daudaun ne’e halo ona preparasaun másimu no prontu atu bá kompete iha eventu internasionál ne’e.

“Agora, ita-nia boxista profisionál na’in-rua ne’e prepara ona. Eventu ne’e Delio sei joga iha ronde neen (6) no Daniel sei joga iha ronde haat (4). Sira-nia preparasaun ne’e, ita bele dehan másimu tanba ba joga ne’e sira sei hasoru boxista ne’ebé kampiaun iha Indonézia. Maibé, ita la ta’uk. Sira-na’in rua nafatin treinu iha fíziku, tékniku no tátiku,” Abílio tenik.

Aleinde hetan apoiu husi timoroan iha Koreia Súl, Abílio informa, klube El-Matadór mós hetan apoiu másimu husi patrosinadór prinsipál sira hanesan Caltech, Borala Fuel Lda no Tahana.

Jornalista : Felicidade Ximenes

Editór: Xisto Freitas da Piedade

iklan
iklan

Leave a Reply

iklan
error: Content is protected !!