MAPPF halo akizisaun ba ró peska unidade 140
DILI, 28 Janeiru 2024 (TATOLI) – Ministériu Agrikultura, Pekuária, Peska no Floresta (MAPPF) halo ona akizisaun ba ró peska unidade 140, ne’ebé sei distribui ba peskadór sira iha territóriu.
Ró ne’e nia alokasaun orsamentu husi verba 2024 nian no empreza Auto Zone sosa unidade 100 ho nia mákina elétrika ba ró 146 no empreza Seramor sosa unidade 40 ho nia mákina 40.
“Husi ró 140 ne’e, empreza Auto Zone ita prevee orsamentu $744.080 no Seramor hamutuk rihun $216. Ró sira ne’e sei to’o Marsu tinan ne’e hodi distribui tan ba peskadór sira”, Marcos da Cruz adianta iha Comoro.
Membru Governu ne’e dehan ró peska ne’e importante, tanba daudaun peskadór barak hatama ona pedidu maibé ró mak seidauk iha.
Lembra katak, iha 2022, ministériu sosa ona ró 110 ne’ebé fahe ona ba peskadór sira no iha tinan ne’e kontinua fahe, liuliu ba peskadór sira iha kosta súl nian hanesan iha Manatuto-Natarbora, Covalima-Suai no Bobonaro-Atabae.
“Ró sira ne’ebé ita iha tinan kotuk distribui hotu ona. Iha parte kosta norte nian, ami halo deskarregamentu iha Lautém-Com. Haree katak ró ne’e apoia duni peskadór sira ba kail ikan. Sira la’o kalan rua, loron rua, ho ró 23 no fila mai hetan ikan tonelada tolu”, dehan.
Husi parte ministériu nafatin apoia peskadór sira no halo monitorizasaun ba sira-nia atividade. “Ita hein katak ró ne’e mai ajuda tan peskadór sira buka ikan no fa’an ba merkadu”, nia realsa.
Ministériu antes ne’e sosa, iha 2022, ró 110 ho osan rihun $500, maibé 22 maka nia prosesu iha hela justisa. Ró ne’ebé iha ona diresaun nia liman iha bero hamutuk unidade 88. Husi totál númeru ne’e distribui ona unidade 55 ba peskadór sira iha Dili no Ataúro 14, Liquiçá sia, Viqueque 20, Manufahi neen no Manatuto neen.
Ministériu disponibiliza bero ba peskadór sira nu’udar meiu transporte ida atu hala’o sira-nian atividade loroloron nian iha tasi hodi bele lori bá fa’an iha merkadu.
Notísia relevante: Peskadór barak lahalo jestaun di’ak ba utilizasaun ró peska – MAPPF
Jornalista: Arminda Fonseca
Editora: Maria Auxiliadora
