iklan

NASIONÁL, HEADLINE

PPN no Embaixadora Manuela diskute konsolidasaun lian portugés iha Timor-Leste

PPN no Embaixadora Manuela diskute konsolidasaun lian portugés iha Timor-Leste

Embaixadora Portugal iha Timor-Leste, Manuela Bairos. Imajen Tatoli/Egas Cristóvão

DILI, 28 janeiru 2025 (TATOLI)–Prezidente Parlamentu Nasionál (PPN), Maria Fernanda Lay, tersa ne’e, simu audiénsia husi Embaixadora Portugal iha Timor-Leste, Manuela Bairos, hodi diskute kooperasaun ba konsolidasaun lian portugés iha Timor-Leste.

“Enkontru ho Prezidente Parlamentu hanesan inísiu do ano no diskute matéria ne’ebé iha ho ita-nia kooperasaun entre Portugal no Parlamentu, hanesan ita hatene relasaun ida entre Parlamentu Asembleia Repúblika Portugal ho Parlamentu Timor-Leste, designadamete iha apoiu konsolidasaun lian portugés, portantu oinsá haree tinan ne’e dezenvolve liután kooperasaun ne’e,” Embaixadora Manuela Bairos, hato’o hafoin ramata sorumutu iha resintu PN.

Embaixadora dehan, durante sorumutuk ko’alia mós ajenda Prezidente Asembleia Repúblika Portugal ne’ebé sei vizita Timor-Leste iha tinan ne’e no diskute PN sei komemora loron mundiál lian portugés iha loron 05 maiu.

Notísia relevante : INFORDEPE fó formasaun lian portugés ba profesór 30 husi Ensinu Sekundáriu

Nune’e, kooperasaun sira iha futuru ho membru Parlamentu no joven timoroan, universidade, eskola sira, ba konsolidasaun, relasaun bilaterál, istórika, antiga nomós konsolidasaun lian portugés.

“Portantu, ko’alia jenérika de’it ba inísiu tinan foun, ho tinan foun ne’e lori dejezu no dezáfiu foun,” nia akresenta.

Diplomata portugueza ne’e konsidera lian portugés sai nu’udar mós identidade nasaun ne’e nian no observa iha avansu ba timoroan sira ne’ebé apreende lian ofisiál ne’e.

“Ha’u hanoin kestaun lian portugés ba jerasaun foun tenke orgullu ho eransa lian portugés, tanba ne’e ba jerasaun foun sira tenke halo reflesaun ida kona-ba saida mak signifika iha lian portugés entre lian ofisiál, perspetiva ba ita-boot sira-nia identidade no afirmasaun iha mundu, tanba ha’u razaun boot lian portugés loke odamatan ba mundu,” nia tenik.

Nia konsidera, iha rejiaun ne’e Timor-Leste nu’udar úniku nasaun iha lian portugés, ne’ebé nu’udar lian ofisiál, ida-ne’e sai hanesan mós vantajen ba kooperasaun, pur ezemplu entre ASEAN Timor-Leste bele sai ponte ASEAN no nasaun lian portugés iha Áfrika iha Brazil.

“Ha’u bele dehan, iha Xina iha universidade 74 hanorin ho portugés, tanba Xina iha ambisaun globál simu lian portugés, loke odamatan ba Áfrika, Amérika Latina no Europa,” Embaixadora katak.

Jornalista     : Nelson de Sousa

Editora         : Julia Chatarina

iklan
iklan

Leave a Reply

iklan
error: Content is protected !!