DILI, 28 Janeiru 2025 (TATOLI) – Primeiru-Ministru, Xanana Gusmão, no Ministru Interiór Austrália, Tony Burke, hasoru malu hodi diskute asuntu oioin, liuliu kooperasaun entre país rua.
“Ita ko’alia asuntu barak, maibé ha’u ko’alia jerál ba kooperasaun nian traballadór timoroan barak bá serbisu iha Austrália no ita mós ko’alia asutu seguransa sibernétika”, Xanana dehan iha Palásiu Governu, ohin.
Xefe Ezekutivu ne’e apresia ba prezensa husi ministru australianu nian iha Timor-Leste, tanba ida ne’e reforsa amizade Timor-Leste no Austrália, tanba nasaun viziña ne’e apoia tebes Timor-Leste nia adezaun ba ASEAN.
Iha fatin hanesan, Ministru Interiór Austrália, Tony Burke, hateten vizita mai Timor-Leste tanba relasaun amizade ne’ebé forte tebes iha área barak hanesan edukasaun, empregu no relasaun entre ema ho ema.
“Ami halo diskusaun ba buat barak kona-ba seguransa iha área sibernétika nian no kontrabandu sira iha área illegál, tráfiku umanu no seguransa online nian mós. Ha’u hanoin vizita ida-ne’e fila sei lori amizade ne’ebé metin liután”, nia subliña.
Tuir nota imprensa ne’ebé Tatoli asesu, vizita Ministru Interiór Austrália iha Timor-Leste atu halo diskusaun kona-ba prioridade mútua sira, reafirma Austrália nia amizade ho parseiru besik.
“Austrália komprometidu atu serbisu hamutuk ho Timor-Leste hodi rezolve dezafíu sira ne’ebé fahe hamutuk hanesan migrasaun irregulár, inklui kontrabandu ka hatama ema ho ilegál no tráfiku umanu, jestaun fronteira, no seguransa sibernétika. Ema liu 9.500 ho orijen Timor-oan bolu Austrália nu’udar uma, no ami apresia kontribuisaun ne’ebé sira halo ba ami-nia rain. Ita-nia ligasaun povu ba povu ho Timor-Leste hatudu forsa husi relasaun bilaterál, no potensiál ne’ebé eziste atu habelar kooperasaun iha futuru”, dokumentu ne’e dehan.
Governante australianu ne’e iha esperansa atu hametin relasaun artístiku no kulturál entre nasaun rua ne’e. “Ho fahe istória sira liuhusi arte, ita bele haburas komprensaun mútua, no hetan hanoin kle’an liután kona-ba ita-nia aan rasik”, salienta.
Dokumentu ne’e haktuir katak durante vizita husi Ministru Interiór Austrália ne’e hasoru malu ho Prezidente Repúbpika, José Ramos Horta, Primeiru-Ministru, Xanana Gusmão, Ministru Interiór, Francisco da Costa Guterres no membru Governu sira seluk.
Notísia relevante: PM Austrália kongratula TL ne’ebé susesu organiza simu vizita Papa Francisco
Jornalista: Arminda Fonseca
Editora: Maria Auxiliadora
