DILI, 28 janeiru 2025 (TATOLI)—Ministru Justisa, Sergio de Jesus Fernandes da Costa Hornai, hateten Ministériu Justisa (MJ) prevee osan orsamentu rihun $350-resin ba dezeñu Sentru Juvenil.
“Orsamentu ba Sentru Juvenil tinan ida-ne’e ita prevee de’it purvolta $350.000-resin para konklui prosesu administrativu sira liuliu ba iha dezeñu oinsá mak atu selu tékniku sira hodi halo vizibilidade ba servisu sira-ne’e,” Sergio Honai tenik ba jornalista sira iha Gabinete Ministru Justisa, Colmera, Dili, tersa ne’e.
Nia dehan, ekipa Ministériu Justisa hamutuk ho Ajénsia Dezenvolvimentu Nasionál (ADN) bá haree ona rai ba futura instalasaun Sentru Juvenil ne’ebé sei halo iha Tibar, postu administrativu Bazartete, munisípiu Liquiçá.
Notísia relevante: Kriminaliza ‘’la’e’’ ba labarik, nesesáriu konstrui sentru juveníl iha tinan ne’e
“Ohin ita-nia ekipa téknika husi Ministériu Justisa halo servisu koordenasaun téknika balun ho Ajénsia Nasionál Dezenvolvimentu hodi halo diskusaun téknika ruma para fó kontinuidade ba iha projetu referidu,” Sergio haktuir.
Antes ne’e, Ministru Justisa esplika katak objetivu harii Sentru Juvenil atu eduka labarik menoridade sira atu labele envolve tan iha krime.
Ministru fó razaun katak iha Konstituisaun RDTL konsagra iha artigu 18 katak fó protesaun ba labarik sira-nia direitu no tuir prinsípiu internasionál tenke proteje labarik sira-nia direitu hodi labarik sira labele aplika responsabilidade kriminál.
“Ita-nia konstituisaun define klaramente katak labele fó kastigu ba ema ne’ebé imputabilidade tanba nia menoridade, tanba nia inkapasidade ba responsabilidade kriminál,” Sergio Hornai hateten ba jornalista sira iha nia kna’ar fatin, foin lalais ne’e.
Jornalista: Natalino Costa
Editór: Xisto Freitas da Piedade
