DILI, 30 janeiru 2025 (TATOLI)–Diretora Armazenamentu iha Institutu Nasionál Farmásia no Produtu Médiku (INFPM), Cesaltina Bento Gomes, informa, ai-moruk Levothyroxine stock sufisiente iha armazein nasionál.
Levothyroxine hanesan ai-moruk hodi kura ipotiroidizme ou kondisaun glándula tireóide, ne’ebé iha posibilidade prodús ormóniu tireoidianu hodi bele halo perturba prosesu metabolisme isin.
“Relasiona ho kazu ne’ebé daudaun ne’e virál iha rede sosiál, liuliu Facebook, kona-ba pasiente ida mate iha ospitál Horex tanba ai-moruk Levothyroxine stockout, maibé iha armazein sentrál Dili aimoruk ne’e sufisiente,” Diretora informa ba Agência Tatoli, iha resintu INFPM, Kampu-Alor, kinta ne’e.
Nia dehan, ospitál no sentru saúde presiza halo pedidu ba armazein rejionál ka nasionál.
konfirma katak item aimoruk ne’e oras ne’e dadaun sei iha estoke iha armazen sentral INFPM.
Diretór Ezekutivu INFPM, Brígido Dias, hateten, stock ai-moruk iha armazein nasionál daudaun ne’e iha 78% no estoke out 22%.
“Daudaun iha semana ida-ne’e ita-nia stock atuál ne’e 78% mak sei iha, ne’ebé mak laiha ne’e 22 %, maibé relatóriu semana nia ne’e tun tiha ba 20%, hanesan ha’u dehan dadus iha ne’e movél, hanesan ai-moruk foin tama mai, dala ruma distribui kedas, ne’ebé nia númeru ne’e hanesan tun sae hela de’it,” nia akresenta.
Notísia relevante : Diretór ospitál Baucau klarifika pasiente JF mate tanba pneumonia
Iha sorin seluk, Diretór Nasionál Farmasia Produtu Mediku (DNFPM), Delfim Fereira, hateten, husi parte Diresaun prepara ona lista ai-moruk 396 item ba tinan 2025.
“Ita kompra ba tinan 2025, DNFPM prepara lista kuantifikasaun ida no lista ne’e bazeia ba lista medikamentu nasionál ne’ebé mak regularmente ita uza iha fasilidade saúde sira no lista foun ne’e purvolta 396 item ba medikamentu deit, ne’ebé mak ita prepara atu submete ba Ministra Saúde atu aprova hodi hato’o ba Institutu Nasionál Farmásia Produtu Medikamentu atubele prosesu aprovisionamentu,” nia katak.
Jornalista : Felicidade Ximenes
Editora : Julia Chatarina
