DILI, 30 janeiru 2025 (TATOLI)–Bankada Governu husi Congresso Nacional da Reconstrução Timorense (CNRT) no Partidu Demokrátiku (PD) prepara ona kandidadu na’in-rua atu reprezenta Parlamentu Nasionál (PN) ba Conselho de Imprensa (CI) Timor-Leste.
“Iha ona ida (kandidatu) legál ne’e PD nian, no ami nian mak ba mídia, ne’ebé hein naran ami haruka ba (meza) Parlamentu, sira lee naran ita-boot rona,” Xefe Bankada CNRT, Duarte Nunes, informa ba Agência tatoli, iha resintu Parlamentu Nasionál (PN), kinta ne’e.
Kandidatu ne’ebé aprezenta iha esperiénsia no kuiñesimentu iha área legál no mídia nian.
Antes ne’e, Prezidente Parlamentu Nasionál (PPN), Maria Fernanda Lay, informa, meza PN iha tempu badak sei tau ajenda iha plenária hodi hala’o eleisaun hili reprezentante PN ba CI.
“Ha’u hanoin pedidu membru sei mantein ne’e atu troka, ami sei fó ninia kandidatu antes fevereiru para tomada pose no iha líder bankada mós ko’alia ona, (kandidatu) iha ona, agora entre kandidatu sira ne’e ita atu hili ida ne’ebé tenke ko’alia ba malu entre bankada,” PPN akresenta.
Notísia relevante : PN sei hili reprezentante PN ba CI iha tempu badak
Iha tempu badak meza tau ajenda iha plenária hodi bele hala’o eleisaun tanba konselleiru atuál iha CI ninia mandatu sei termina iha tempu dabak.
“Ida-ne’e ita-boot sira akompaña de’it, klaru iha prazu másimu,” nia tenik.
Tuir Lei Komunikasaun Sosiál, Parlamentu Nasionál tenke hili ema na’in-rua, ne’ebé méritu iha komunikasaun sosiál no ema ida nu’udar jurista ne’ebé ninia esperiénsia iha área jurídiku nian.
Tuir Lei Komunikasaun Sosiál númeru 5/2014, 19 novembru, iha artigu 45 kona-ba kompozisaun Conselho de Imprensa hamutuk membru na’in-lima, ne’ebé atu hili liuhusi dalan tuir mai:
- Reprezentante jornalista na’in-rua ne’ebé sira hili tiha ona liuhusi eleisaun;
- Reprezentante órgaun komunikasaun sosiál ida, ne’ebé órgaun sira hili tiha ona liuhusi eleisaun;
- Sidadaun na’in-rua ne’ebé ho kapasidade be ema hotu hatene no iha méritu profisionál ho preferénsia ne’ebé hatutan ba komunikasaun sosiál, hosi sira na’in-rua ida nu’udar jurista, ne’ebé Parlamentu Nasionál hili;
- Membru sira Conselho de Imprensa hili entre sira-nia prezidente.
Iha artigu 46 kona-ba mandatu membru CI nian iha durasaun tinan haat, ne’ebé sei bele renova dala ida de’it.
Entretantu, liuhusi konferénsia konjuntu parte husi parte asosiasaun jornalista hanesan Timor-Leste Press Union (TLPU), Assosiasaun Jornalista Timor-Leste (AJTL) no Uniaun Profisionál Jornalista Timor-Leste (UPJTL), ne’ebé CI realiza iha tinan kotuk ne’e hili ona reprezentasaun jornalista ba períodu 2025 to’o 2029 mak hanesan Joaquim Coutinho no Cesar Mali no reprezentante mídia-na’in mak Suzana Cardoso.
Jornalista : Nelson de Sousa
Editora : Julia Chatarina
