DMTC Covalima kontribui ona reseita rihun $ 94-resin ba kofre Estadu
COVALIMA, 30 janeiru 2025 ( TATOLI)- Hahú janeitu to’o dezembru 2024 ne’e, Dirasaun Transporte no Komunikasaun (DMTC, sigla portugés) kontribui ona reseita $ 94,633.50 ba kofre Estadu, Diretór DMCT Covalima, Joaquim Gusmão relata.
“Ami kontribui reseita hamutuk $ 94,633.50 ba kofre Estadu ne’ebé nia fonte orsamentu mai husi inspesaun, lisensa trajetu, halo rejistu, xapa mátrikula lakon no troka xapa mátrikula”, Joaquim Gusmão, relata dadus ne’e ba jornalista sira, iha Bairru Costa, ohin.
Reseita ne’ebé arrekada ne´e, DMTC kontribui mai husi inspesaun, lisensa trajetu, halo rejistu, xapa mátrikula lakon no troka xapa mátrikula ho totál fatura (invoice) hamutuk 6, 535 ho nia orsamentu $ 94,633.50 hodi kontribui reseita ba kofre Estadu.
Fatura hamutuk 6,535 inspesaun karreta no motorizada nia fatura hamutuk 4848 ho nia orsamentu hamutuk $ 68,540.00, lisensa trajetu fatura188 orsamentu $ 4,145.00, karta kondusaun ho nia fatura 255 $ 4,890.0.
Fonte orsamentu husi rejistu ho totál fatura hamutuk 1,166 $ 15,538.50, xapa mátrikula lakon ho total invoise 34 ho orsamentu $ 437.50 no troka xapa mátrikula husi privadu ba transporte públiku ho nia fatura hamutuk 44 ho orsamentu $ 1,082.52.
Nune’e nia dehan, reseita ne’ebé DMTK Covalima, kontribui husi 2024 mak reseita boot liu kompara ho 2023 ne’e, tanba 2023 ne’e kontribui de’it rihun $ 70-resin no iha 2024 kontribui rihun 94-resin ida-ne’e depende sidadaun sira-nia konsiénsia uza transporte públiku no privadu sira.
“Sidadaun iha konsiénsia bainhira nia dokumentu mate karik ita rasik mak iha hanoin atu halo renovasaun tanba bainhira polísia Tránzitu halo pasa revista ne’e ita rasik mak simu konsékuensia hodi selu multa di’ak liu mak bainhira dokumentu mate presiza halo renovasaun nune’e halo movimentu ho transporte públiku no privadu ho livre”, nia dehan.
Iha sorin seluk ,Motorista Jefriano Gomes dehan, halo renovasaun dokumentu iha Dirasaun Transporte no Komunikasaun ne’e importante nune’e bainhira polísia tránzitu halo pasa revista labele halo apreensaun ba motorizada ne’ebé uza halo movimentu.
“Ha’u hanoin hanesan sidadaun ne’e presiza halo renovasaun dokumentu nune’e ita labele hafuhu malu ho polísia tránzitu tanba bainhira ita-nia dokumentu mate mak la renova ita la livre atu halo movimentu ho transporte públiku no privadu sira,” nia fó hanoin.
Jornalista: Celestina Teles
Editór: Rafael Ximenes de A. Belo
