DILI, 30 janeiru 2025 (TATOLI)–Komisaun C ne’ebé trata asuntu Finansa Públika iha Parlamentu Nasionál (PN) tau ona ajenda iha loron 12 to’o 14 fevereiru tinan ne’e sei halo audiénsia públika ba proposta-lei númeru 14/VI (2a) Enkuadramentu Orsamentu Jerál Estadu no Jestaun Finanseira Públika.
“Lei Enkuadramentu ami sei komesa uluk ho audiénsia iha loron 12 to’o 14 fevereiru ho Ministériu Finansa (MF), Banku Sentrál Timor-Leste (BCTL, sigla portugés), Instutu Nasionál Seguransa Sosiál (INSS) ho parte relevante balun, depois iha loron 27 fevereiru ami aprova relatóriu no paréser Komisaun C nian no iha inisíu marsu ita bele lori ba halo ona aprovasaun jeneralidade iha plenária no hotu konforme fali ba plenária atu fó fali mai komisaun halo diskusaun ami kontinua kedas ba espesialidade,” Prezidente Komisaun C, Cedelízia Farria dos Santos, informa ba Agência Tatoli, iha resintu PN, kinta ne’e.
Nia haktuir, iha proposta alterasaun ne’e Governu propoin atu altera artigu lubun pur volta 30-resin iha lei vijente, maibé ho nia detallu no konteúdu agora seidauk bele fó sai, nune’e baninhira tama ona iha audiénsia mak bele hatene liután.
Iha loron 09 dezembru 2024, meza PN liuhusi reuniaun plenária halo anúnsiu ba admisaun no baixa ba Komisaun C ba proposta-lei refere hodi bele halo apresiasaun inisiál.
Notísia relevante : Meza PN baixa proposta-lei Jestaun Finanseira Públika ba komisaun C
Iha loron 02 outubru 2024, Governu liuhusi reuniaun ordinária Konsellu Ministru (KM) aprova ona projetu proposta-lei ne’ebé aprezenta husi Ministra Finansa, Santina Cardoso, kona-ba Lei Jestaun Finanseira Públika, ne’ebé substitui lei númeru 2/2022, loron 10 fevereiru.
Inisiativa ne’e ho objetivu atu hametin jestaun finansa públika hodi introdús melloramentu iha prosesu orsamentál.
Nune’e mós, hanesan parte husi reforma jestaun finansa públika, ne’ebé prevee iha programa IX Governu Konstituisionál, ne’ebé diploma ne’e promove interligasaun boot tebes ida entre orsamentu no planeamentu hodi asegura jestaun ne’ebé efisiente no transparante liu iha rekursu Estadu nian.
Jornalista : Nelson de Sousa
Editora : Julia Chatarina
