Komisaun E iha PN aprova paresér proposta-lei Legalidade Urbanístiku
DILI, 30 janeiru 2025 (TATOLI)–Komisaun E ne’ebé trata asuntu Infraestrutura iha Parlamentu Nasionál (PN), kinta ne’e, halo aprovasaun ba relatóriu no paresér ba proposta-lei númeru 9/VI (1a) kona-ba Medida Tutela Legalidade Urbanístika, ho votu afavór hitu, kontra 0 no abstensaun laiha 0.
“Ne’e signifika bankada opozisaun (iha konsensu, tanba inisiativa lei ne’e mai kedas husi VIII Governu no iha IX Governu kontinua de’it, ne’e mak ami membru husi Komisaun E aprova tiha ona relatóriu no paresér,” Prezidente Komisaun E, Marcos Xavier, hato’o hafoin reuniaun komisaun iha sala komisaun iha PN.
Nia dehan, iha paresér komisaun nia hato’o rekomendasaun oinsá bele aselera diskusaun lei refere hodi nune’e IX Governu Konstituisionál ho Governu sé de’it mak mai iha futuru bele implementa. Tanba ne’e importante tebes atu regula sidadaun sira harii uma iha territóriu no regula mós komunidade harii uma iha valeta leten, fatin risku dezastre hanesan mota ninin no foho lolon.
Bainhira lei ne’e iha ona bele reforsa ezekutivu nia serbisu hodi hala’o kontrolu di’ak liután ba edifísiu sira.
Notísia relevante : Governu hakarak regula konstrusaun edifísiu iha territóriu
Tuir ajenda, iha semana oin inisiativa lejislativu ne’e sei tau ajenda diskusaun iha plenária iha faze jeneralidade.
“Hotu tiha mak ba (kontinua) audiénsia ba espesialidade ne’e ita haree artigu pur artigu,” akresenta.
Antes ne’e, komisaun hala’o audiénsia públika ba proposta-lei ne’e husi entidade relevante hanesan Ministériu Administrasaun Estatál (MAE) no Ministériu Obra Públika (MOP), Ministériu Planeamentu no Investimentu Estratéjiku (MPIE) nomós hala’o ona konsultasaun ba munisípiu haat ho autoridade lokál, populasaun ho entidade relevante seluk hodi rona sira-nia hanoin.
MOP sai autór ba proposta-lei ne’e iha artigu 17, no kona-ba konteúdu detallu kada artigu komisaun seidauk bele esplika tanba fó uluk apresiasaun inisiál no sei tama diskusaun espesífiku kada artigu iha faze espesialidade iha tempu tuir mai.
Jornalista : Nelson de Sousa
Editora : Julia Chatarina
