BAUCAU, 30 Janeiru 2025 (TATOLI) – Prosesu konstrusaun saladeaula iha Eskola Bazika Filiál (EBF) N.u 4 Buruma, iha postu administrativu Baucau Vila, iha faze finalizasaun.
Xefi suku Buruma, Libório dos Santos Freitas, hateten projetu ne’e implementa liuhusi aktividade regulár Programa Nasionál ba Dezenvolvimentu Suku (PNDS) siklu daneen tinan 2024, tanba konsidera importante atu fasilita alunu sira tuir prosesu ensinu aprendizajen.
“Antes trimestrál dahuluk tinan-ne’e, ita bele finaliza ona”, xefi suku Buruma informa ba Tatoli iha Vila Antiga, Baucau, ohin.
Projetu ne’e konstrui saladeuala haat no daudaun monta ona kuda-kuda no iha tempu badak sei taka zinku antes reboka. Bainhira ramata maka autoridade suku sei halo reuniaun konsellu suku nian hodi define tan prioridade PNDS nian ba tinan ne’e.
Autoridade suku Buruma ne’e admite katak, durante ne’e, eskola referida falta saladeaula, nune’e ho aumentu infraestrutura sei apoia estudante sira hala’o aprendizajen tuir oras ne’ebé parte Edukasaun estabelese.
Antes ne’e, EBF Buruma iha de’it saladeaula sanulu, ne’ebé utiliza husi estudante siklu dahuluk to’o datoluk, nune’e obriga tenke fahe ba klase dadeer no loraik, nune’e ho aumentu sala haat bele tulun estudante sira tuir prosesu ensinu-aprendizajen.
Suku Buruma, iha tinan 2024, hetan alokasaun orsamentu $49.250 husi PNDS hodi implementa projetu konstrusaun EBF siklu dahuluk to’o datoluk, ne’ebé lokaliza iha aldeia Suli-Ua, ne’ebé benefisia estudante hamutuk 468, kompostu husi mane 242 no feto 226.
Suku Buruma iha aldeia haat mak Tasi, Casmutu, Onosere no Suli-Ua ho totál populasaun 3.639.
Jornalista: Natalino Belo
Editora: Maria Auxiliadora
