COVALIMA, 31 janeiru 2025 (TATOLI) – Organizasaun Internasionál Mercy Corps entrega pakote naun alimentár (non food) 95 ho item 21 ba Autoridade Protesaun Sívil (APC-sigla Portugés) no ba Servisu munisípiu Jestaun Risku Dezastre Naturál (SMJRDN), hodi rai iha armajen, halo preparasaun atu responde ba vítima dezastre Naturál, iha Munisípiu Covalima.
“Ita entrega pakote non food item ba Autoridade Protesaun Sívil no Servisu munisípiu Jestaun Risku Dezastre Naturál atu responde ba situasaun emerjénsia”, Adjuntu Jestór Programa Jere risku liuhusi Dezenvolvimentu Ekonomia Mercy Corps, Paulo Soares hato’o, molok entrega apoiu iha Santa Rosa, ohin.
Adjuntu Paulo dehan, Mercy Corps hanesan organizasaun internasionál iha Timor-Leste, kolabora ona DJRDN Nasionál no munisípiu ne’ebé mak parseiru serbisu durante tinan 10-resin ona.
Tanba ne’e APC ho DMJRDN oinsá atu hala’o serbisu hodi diminui risku dezastre naturál ho tipu oioin ne’ebé akontese iha Covalima.
“Ami apoiu ne’e fundu mai husi rejionál hamutuk rihun $14 -resin liuhusi programa Jere risku liuhusi Dezenvolvimentu Ekonomia hodi apoiu kona-ba nesesidade emerjénsia, non food item ne’ebé ita hakarak, rai rezerva iha armajen oinsá mak ita halo preparasaun ita-nia aan atu responde ba dezastre”, nia esplika.
Nia dehan, Mercy Corps entrega mai iha Covalima item 21 ho totál pakote 195. Husi númeru ne’e, pakote 100 apoiu ba Ainaro no pakote 95 mai iha Covalima.
Tan Mercy Corps husu pakote ida-ne’e hanesan patrimóniu Estadu uza ho loloos ba vítima ne’ebé afeta hosi dezastre naturál no distribui no utiliza ho responsabilidade.
Pakote ne’ebé entrega ne’e mak hanesan sanan, masa litru 30 ida, basia ida, bikan, Gayung, kopu, kanuru, toalla ida, pasta-dente, eskova-nehan, lilin, biti, sabaun, deterjen ba fase bikan, rinso ba fase roupa, sampo, lipa, muskiteru, manta no lona.
Iha sorin seluk, Diretór Servisu Munisipál Jestaun Risku Dezastre Naturál, João Martins hato’o agradesementu ba Organizasaun Internasionál Mercy Corps nia preparasaun entrega produtu naun-alimentár item mai iha Covalima.
“Mercy Corps entrega non food item ida-ne’e la’ós ba APC no SMJRDN maibé atu fó apoiu ba ita-nia komunidade iha Covalima bainhira iha tempu udan mosu dezastre naturál”nia reforsa.
Razaun parseiru sira tau matan de’it mai iha Covalima tanba durante ne’e bainhira iha tempu udan sempre mosu dezastre naturál .
Komandante Operasaun APC, Covalima, Celestino Afonso konfirma katak, APC nafatin serbisu hamutuk ho Mercy Corps, tanba Mercy Corps durante ne’e fó apoiu emerjénsia no fasilita formasaun kona-ba Dezastre Naturál.
“Ohin item lubuk ida mak entrega mai husi ita-nia parseiru Mercy Corps mai iha Covalima la’ós ba APC maibé ba komunidade ne’ebé mak vítima ba dezastre naturál”,n ia hateten.
APC ho DMJRDN liman-ain husi Governu atu fó apoiu ba komunidade ne’ebé sai vítima dezastre Naturál sira hodi hakmaan sira-nia problema ne’ebé enfrentadu.
Entretantu, Mercy Corps iha Timor-Leste foka ba agrikultura, meius subsisténsia rurál, nutrisaun, enerjia sustentável no redusaun risku dezastre.
Jornalista: Celestina Teles
Editór: Rafael Ximenes de A. Belo
