DILI, 31 janeiru 2025 (TATOLI)–Komisaun C ne’ebé trata asuntu Finansa Públika iha Parlamentu Nasionál (PN) rekomenda ba autoridade munisipál sira atu iha planu di’ak hodi bele dezenvolve área pontensiál hanesan turizmu no seluk tan hodi bele hetan reseita própria.
Prezidente Komisaun C, Cedelízia Farria dos Santos, haktuir, membru komisaun foin lalais hala’o fiskalizasaun bá munisípiu Manufahi, nota katak ezekusaun orsamentu la’o di’ak.
“Ita aprova ona lei desentralizasaun no Governu mós nia planu atu tama ba implementasaun desentralizasaun, maibé ita-nia preokupasaun boot mak reseita, tanba bainhira ita tama ona desentralizasaun kada munisípiu nian tenke sustenta munisípiu ho ninia orsamentu rasik, entre 40% ou 60% no balun husi nasionál, maibé ami haree kuaze munisípiu hotu inklui munisípiu Manufahi nia reseita ne’e kuaze laiha, balun ne’e tinan-ida bele to’o $500 no a’as liu $1.000, ne’ebé tama husi publisidade sira,” Prezidente Komisaun C informa ba Agência Tatoli, iha resintu PN, sesta ne’e.
Notísia relevante : Governu kontinua servisu ba kondisaun mínimu prosesu desentralizasaun-poder lokál
Komisaun nota munisípiu sira seidauk iha kapasidade atu jere no hamata reseita, hanesan iha Manufahi iha estátua Dom Boabentura bele halo planu no dezenvolve hodi hatama reseita.
“Ema sé mak tama vizita pur ezemplu selu sentavu $0,25 hodi bele hatama reseita, maibé sira la hanoin kona-ba ida-ne’e no iha fatin turístika barak ne’ebé iha, seluk tan tuir loloos hadi’a halo didi’ak tan sai meiu reseita. Lei ne’e fó dalan ba sira atubele buka reseita, nune’e importante halo konsultasaun ho Ministériu Administrasaun Estatál (MAE),” akresenta.
Komisaun tau ona rekomendasaun iha relatóriu fiskalizasaun no sei hato’o ba entidade relevante.
Jornalista : Nelson de Sousa
Editora : Julia Chatarina
