DILI, 31 janeiru 2025 (TATOLI) – Empreza Weststar-GAP Aviation no Santos NA (19-12) Pty. Ltd, empreza petrolífera australiana, formaliza kontratu servisu elikópteru nian iha Timor-Leste ho valór millaun $40.
Asinatura kontratu ne’e entre Vise-Prezidente Ezekutivu Santos, Vince Santostefano, no Diretór Aviasaun Weststar-GAP, Syed Muhammad Azni Syed Azman, ho sasin husi Vise-Prezidente Upstream Gas and Liquids, Western Austrália, Notrhern Australia and Timor-Leste, Marcie Evans, no Membru Konsellu Administrasaun Weststar-GAP Aviation, Vicente da Costa Pinto.
Weststar-GAP Aviation Lda hanesan konsóriu ida entre Timor GAP husi Timor-Leste no Weststar Aviation husi Malázia ne’ebe harii iha fulan-Juñu 2020.
Prezidente Timor GAP, Rui Maria Alves Soares, hateten sira-nia parte kontente foti desizaun hili Weststar Aviation nu’udar parseiru, tanba empreza ida ne’ebé lidera iha indústria servisu elikópteru ba offshore, foku ba seguransa nian ne’ebé hetan fiar husi empreza boot sira petrolíferu nian.
Weststar rasik atende ona empreza sira hanesan Chell, ConocoPhillips no agora aumenta tan kompañia Santos Austrália.
“Ami sente orgullu no entuziasmu tebes atu lori padraun eselente no dezempeñu seguransa nian iha nivel aas liu ba setór mina no gás Timor-Leste, liuhusi nia subsidiária Weststar-GAP Aviation”, Rui Maria Alves Soares dehan, ohin.
Nia subliña katak liuhusi akordu ne’e, hatudu kompromisu Timor-Leste nian ba Santos atu fornese serbisu elikópteru ne’ebé seguru no efisiente ho tripulante aviau hotu-hotu husi Malázia ka husi Timor-Leste prontu atu kumpre seguransa iha operasaun ne’ebé efisiente.
Tuir kontratu servisu ho valór millaun $40 ne’e dezeña ba períodu inisiál fulan 12, ne’ebé ho opsaun ba estensaun fulan neen dala rua, sei fornese servisu transporte ho elikópteru ne’ebé apoia operasaun tasi-laran Santos nian iha área Bayu-Undan hahú husi loron 01 Fevereiru 2025.
Vise-Prezidente Ezekutivu Santos, Vince Santostefano, afirma katak empreza Santos sei halo esforsu ba iha serbisu kontratu elikópteru foun ho Weststar-GAP Aviation hodi fó empregu di’ak liu ba traballadór timoroan.
“Ida ne’e hanesan hola parte ida husi kontratu foun ne’e, tanba Weststar-GAP iha kompromisu atu uza subkontratór Timor-Leste nian. Daudaun sira utiliza ona servisu subkontratasaun lokál sira hodi fornese servisu sira ground handling nian iha aeroportu ne’ebé iha ona sidadaun Timor-Leste na’in-ualu, ne’ebé hetan formasaun hodi fornese servisu iha área ne’e”, salienta.
Akordu ne’e sei marka pasu importante ida iha estratéjia Weststar-GAP nian hodi hasa’e servisu aviasaun offshore (tasi-laran) nian iha Timor-Leste ho kreximentu prozitivu iha kampu Greater Sunrise hodi apoia empreza ENI no Sunda Gas.
Diretór Aviasaun Weststar-GAP, Syed Muhammad Azni Syed Azman, hateten empreza sei koloka elikópteru rua ho naran Leonardo AW189, ne’ebé sei halo operasaun hodi semo troka malu ba servisu standby Medevac, Dili, Timor-Leste no Darwin-Austrália, ne’ebé rejistu tuir aviaun Malázia nian (9M), hodi kumpre regulamentu sira Autoridade Aviasaun Sivíl Malázia nian (CAAM, sigla inglés).
“Daudaun ami hahú halo operasaun iha Timor-Leste. Ami sente orgullu atu reafirma ami-nia pozisaun hodi dedika aan atu haburas talentu lokál no kria oportunidade sustentavel. Ami iha kompromisu fó formasaun ba pilotu lokál sira, kuadru operasionál sira hodi kumpre padraun rigoroza sira hosi International Association of Oil and Gas Producers 619 [IOGP]”, nia hateten.
Liuhusi teknolojia estratéjiku no transferénsia koñesimentu Weststar-GAP nian hakarak atu kapasita no hasa’e ema-nia abilidade téknika no seluk tan.
Membru Governu sira ne’ebé partsipa iha asina akordu ne’e mak Ministru Petróleu no Rekursu Minerál, Francisco da Costa Monteiro, Ministru Komérsiu no Indústria, Filipus Nino Pereira, Ministru Investimentu, Komérsiu no Indústria Malázia nian, Datuk Seri Utama Tengku Zafrul bin Tengku Abdul Aziz, no ajénsia sira ne’ebé iha relasaun ho mina no gás.
Notísia relevante: Empreza Weststar fasilita elikópteru rua ba atividade petrolífera
Jornalista: Arminda Fonseca
Editora: Maria Auxiliadora
