DILI, 01 Fevereiru 2025 (TATOLI)- Xefe Estadu Maiór Jenerál FALINTIL- Forsa Defeza Timor-Leste (F-FDTL), Tenente Jenerál Domingos Raul Falur Rate Laek, informa nia parte simu informasaun ida husi servisu informasaun forsa armada katak iha oknum F-FDTL ida envolve iha atividade prátika Grupu Arte Marsiál (GAM) hodi sai treinadór.
“Husu atensaun ba militár sira. Ha’u triste tan ohin dadersan ha’u simu informasaun ida katak membru ho deviza ofisiál ida mak hakarak sai treinadór ba Grupu Arte Marsiál balun,” Tenente Jeneral Falur hateten iha Nia intervensaun bainhira abertura seminar nasionál ba komemorasaun loron transformasaun FALINTIL ba FALINTIL-Forsa Defeza Timor-Leste (F-FDTL) ba dala-24, hala’o iha Kuartel Jenerál, Fatuhada, Sábadu ne’e.
Komandante F-FDTL ne’e afirma nia parte lakohi mensiona oknum ne’ebé envolve prátika iha Grupu Arte Marsiál ne’e nia naran, maibé membru ne’e ho deviza ofisiál.
“Ita atu ba arte marsiál, atu ba profesór atu ba saida de’it, imi tenke ho autorizasaun Xefe Estadu Maiór Jenerál nian. Mas kuandu imi halo ketak husi kotuk ita boot la leal ba instituisaun, halo prosesu ha’u duni sai tiha de’it, ne’e koalia publikamente para imi atu hatene ida ne’e. Tanba ohin ha’u simu informasaun husi via kredivél katak iha ne’e ofisial balun sai instrutór ba Grupu Arte Marsiál “, Falur lamenta.
Ho situasaun ne’e, Falur aviza ba membru F-FDTL sira atu hases-an husi Grupu Arte Marsiál (GAM) nian atividade, hodi serbí de’it ba instituisaun Estadu ne’e.
Notisia relevante:Xanana husu membru F-FDTL no PNTL hatudu onestidade hodi servi povu no nasaun
Jornalista: Natalino Costa
Editór: Florencio Miranda Ximenes
