DILI, 01 Fevereiru 2025 (TATOLI)- Asosiasaun Futeból Munisipiu Manufahi manán títulu kampiaun Kopa Futeból Juvenil U15 2024, ho eskore 3-2 kontra Asosiasaun Futeból Juveníl Baucau, iha final ne’ebé realiza iha Estádiu Munisipal Dili.
Eventu ne’e ho tema “Transforma Futeból Sai Orgullu Nasional”, hodi hatudu poténsia jogadór juvenil sira nian no presiza atensaun husi governu no sosiedade.
Iha biban ne’e, Prezidente Federasaun Futeból Timor-Leste (FFTL), Nilton Telmo Gusmão, hateten katak kompetisaun ne’e sai motivasaun ida ba sosiedade tomak, no presiza investimentu kontinua husi governu, liuliu husi Ministériu Juventude no Desportu (MJDAK).
Notisia relevante:Ekipa “Kuda-Ulun” otimista sei manán “Kulugisa” iha Copa Juveníl sub-15
“Jogadór sira ne’e presiza atensaun no apoiu hodi sai jogadór kualifikadu no atrai interese husi klubu sira,” dehan Gusmao.
Kompetisaun ne’e mos hatudu katak jogadór di’ak sira mai husi asosiasaun Futeból juveníl iha munisípiu sira. Ho ida ne’e, FFTL no MJDAK presiza hala’o esforsu hamutuk hodi dezenvolve talentu sira ne’e.
Prémiu ba manan-nain mak primeiru lugar husi Manufahi (Kampiaun) ho osan $3,500.00, segundu lugar okupa husi Baucau (Runner-Up) ho osan $2,650.00 no klube husi RAEOA mak okupa terseiru klasifikasaun ho osan $2,000.00.
Final ne’e hetan partisipasaun husi figura importante sira hanesan Diretór Jerál Desportu MJDAK, Joao Rodriques, Adjuntu FFTL, Diretór Jerál Arbitragem Timor-Leste, no prezidente Asosiasaun Futeból Munisípiu sira.
Eventu ne’e sai oportunidade ida atu hadiak futuru Futeból nasionál, ho apelu ba governu no sosiedade atu kontinua investe ba jogadór juvenil sira.
Notisia relevante:Ekipa “Kuda-Ulun” otimista sei manán “Kulugisa” iha Copa Juveníl sub-15
Jornalista: Natalino Costa
Editór: Florencio Miranda Ximenes
