BOBONARO, 27 janeiru 2025 (TATOLI)—Sekretáriu Jerál Asosiasaun Futeból Munisípiu Bobonaro, Rosalino Loe Lesu, hateten ekipa Futeból Juvenil husi Bobonaro Kuda-Ulun otimista sei manán ekipa futeból husi Baucau-Kulugisa iha kontinuasaun jogu futeból Copa Juveníl sub-15 ne’ebé sei realiza iha tersa (28 janeiru 2025) iha Dili.
Notísia Relevante: Abertura Copa Juveníl sub-15,Bobonaro ‘dere’ Covalima 4:0
“Ekipa Kuda-Ulun preparadu atu joga tanba konsege gaña titilu vensedór iha Pull C. Ita esforsu halo ida-ne’e maibé mellór atu nune’e bele foti munisípiu nia naran iha nasionál hodi hatudu katak ita mós bele. Ami prontu atu joga ho sira, mai ho idade la hansan mós ita bele manán. Satán, agora selesaun ida-ne’ebé rigorozu ne’ebé ami otimizmu katak Bobonaro sei manán Kulugisa-Baucau,” Nia informa ba jornalista sira, hafoin hala’o despedida ho Prezidente Autoridade Munisípiu Bobonaro, Alexandre Pires, iha salaun Maria-Tapo, segunda ne’e.
Iha serimónia despedida ne’e, Prezidente Autoridade Munisípiu (PAM) Bobonaro, Alexandre Pires, hameno ba jogador sira atu jogu ho esportivitade no dixiplina tanba pontu rua ne’e mak xave ba atu hetan vitória.
“Ema hatama uluk golu ne’e lalika nervozu. Joga nafatin ho tékniku ne’ebé iha. Joga nafatin ho estamina ne’ebé iha. Kuidadu imi-nia saúde, kalan tenke deskansa, labele halimar Game PUBG tanba imi na’in-hira ne’e lori ema rihun 100-resin nia hakarak iha imi nia isin-lolon. Ami hotu tau esperansa ba imi, katak imi fila sei lori istória, sei lori vitória foun ida mai munisípiu Bobonaro,” nia dehan.
Nia enkoraja jogadór sira no promote katak bainhira ekipa futeból ne’e ba joga iha Dili mak manán ekipa husi Baucau-Kulugisa ne’e, nia parte sei ba asiste direta jogu finál hodi fó apoia ba ekipa Kuda-Ulun sub-15 ne’e.
Notísia: Governu halo ona preparasaun másimu hodi realiza jogu CPLP
Jornalista : Sérgio da Cruz
Editór : Cancio Ximenes
