DILI, 06 janeiru 2025 (TATOLI)– Ministru Juventude, Desportu Arte no Kultura (MJDAK), Nelyo Isaac Sarmento, hateten, daudaun ne’e Governu halo servisu másimu hodi prepara ba jogu Komunidade Ko’alia Lian Portugés (CPLP-sigla portugés) ne’ebé Timor-Leste sei sai uma-na’in ita fulan Jullu tinan ne’e.
“Preparasaun ba jogu CPLP ita halo hela, ita hatene katak jogu CPLP ne’e hanesan inisiu atividade internasionál ida ne’ebé realiza iha ita nia nasaun, ita tenke halo preparasaun di’ak atu bele sai uma-na’in di’ak, simu ita nia maun-alin sira husi nasaun CPLP sira atu mai kompete iha jogu ne’e ho di’ak,” Ministru ne’e hateten ba jornalista sira iha Jináziu Dili, segunda ne’e.
Bainhira Timor-Leste susesu organiza atividade ne’e komesa hatudu ona ba mundu internasionál katak Timor-Leste bele organiza tan atividade seluk iha futuru mai.
“Ita hela de’it fulan ne’en atu hala’o ona atividade iha loron 17 to’o 26 Jullu. Entaun agora ita servisu maka’as hela hadi’a fasilidade sira desportu nian, prepara ona komisaun oinsa atu organiza eventu ne’e. Teknikamente ita sei haree. Tanba Ministériu ne’ebé ha’u lidera komisaun ministeriál ida ne’ebé mak servisu maka’as ba ida ne’e, nune’e ha’u fiar katak antes fulan ida atividade hala’o buat hotu ita konklui ona,” afirma Ministru Nelyo.
Ministru ne’e dehan, fatin ne’ebé prepara daudaun ne’e mak hanesan, Jináziu Dili, Estádiu Munisipál Dili, Kampu ba Voleiból, basketból no seluk tan no jogu hotu sei konsentra hamutuk iha kapitál Dili no futeból mak sei hala’o iha Estádiu Gleno bainhira Estádiu Dili ladun iha kondisaun ne’ebé di’ak.
Tuir avaliasaun ne’ebé ekipa CPLP halo iha tinan kotuk foti ona desizaun katak jogu ne’e sei realiza duni iha Timor-Leste.
Molok ne’e, Governu liuhusi reuniaun Konsellu Ministru autoriza utilizasaun orsamentu hamutuk $511.250 hodi halo preparasaun ba jogu CPLP nian. Enkuantu kona-ba realizasaun jogu ne’e Governu preve orsamentu hamutuk $3.730.500.
Eventu ne’e sei halibur partisipante hamutuk 772 inklui delegasaun sira, atleta sira husi nasaun membru CPLP hanesan, Angola, Cabo-Verde, São Tome e Principe, Portugal, Brazil, Guine Bissau, Mosambique, Timor-Leste no Guine Ecuatorial.
Jornalista: Hortencio Sanchez
Editor: Florencio Miranda Ximenes
