Estrada Asudai-Bee-manas Marobo tama ba faze reabilitasaun

BOBONARU, 09 Novembru 2026 (TATOLI) – Ministériu Obra Públika hahú implementa projetu reabilitasaun estrada ne’ebé liga husi merkadu Asudai bá fatin destinasaun turístika Bee-manas Marobo, iha suku Ilat-laun, postu administrativu Bobonaru, munisípiu Bobonaru, ho distánsia kilómetru (km) 5,325.

Koordenadór Infraestrutura MOP Munisípiu Bobonaru, Fernando de Fátima, hatete katak empreza konstrutora Aitula Unipessoal Lda., halo ona mobilizasaun materiál lokál, hanesan fatuk britas no rai-henek, atu apoia implementasaun projetu ne’e.

“Kompaña agora iha ne’ebá ona. Aban ami sei halo Project Cycle Management (PCM) ka Jestaun Siklu Projetu iha edifísiu MOP Bobonaru. Hotu, sira sei hahú serbisu”, nia informa ba jTatoli, iha Maliana, ohin.

Enjeñeiru husi empreza Aitula, Frizzy Satya Anugrah, esplika katak atividade ne’ebé hala’o daudaun mak halibur dadus situasionál husi pontu inísiu iha Asudai to’o pontu finál iha Bee-manas Marobo, nu’udar faze preparasaun antes hahú serbisu fíziku.

“Serbisu fíziku provavelmente sei hahú hafoin PCM, hahú ho alvenaria fatuk, kanál no parede retensaun. Ami espera serbisu ne’e sei la’o ho di’ak no ramata tuir tempu ne’ebé determina ona”, nia dehan.

Iha parte seluk, komunidade Marobo, Costantino Barros, satisfeitu ho projetu reabilitasaun estrada tanba durante ne’e kondisaun aat sai obstákulu ba asesu vizitante sira bá destinasaun turístika Bee-manas Marobo.

Nia konsidera katak estrada ne’e di’ak sei fasilita movimentu komunidade, inklui transporte no fa’an produtu lokál, hanesan ai-manas, tais no seluk tan.

“Ami mós prontu atu koopera ho kompañua atu projetu ida-ne’e bele la’o ho susesu. Bee-manas Marobo importante tebes tanba bele dada ema husi rai-li’ur atu mai vizita. Durante ne’e ema barak la mai tanba estrada aat. Ho estrada di’ak, ami hein katak vizitante lokál, inklui malae sira, bele mai barak”, nia afirma.

Obra ne’e, empreza konstrutora ezekuta ho valór orsamentu $1.366.263,26.

Projetu ne’e, aléin husi hadi’a ligasaun rodoviária, sei kontribui ba dezenvolvimentu área rurál, liuliu iha Suku Ilat-laun, no hametin poténsia turizmu Bee-manas Marobo nu’udar ida husi patrimóniu naturál iha munisípiu Bobonaru.

Notísia relevante: Komunidade husu MOP hadi’a estrada iha Asudai Bobonaru

Jornalista: Sergio da Cruz

Editora: Maria Auxiliadora