DILI, 03 fevereiru 2025 (TATOLI)–Diretora Nasionál Patrimónia Lojístika no Infraestrutura Ministériu Juventude, Desportu, Arte no Cultura (MJDAC-sigla portugés), Maria Luisa Monteiro, informa progresu konstrusaun ba “Uma nahe biti-boot” ne’ebé konstrui iha edifisiu MJDAC Lecidere atinje ona 86,61%.
Notísia Relevante: Progresu konstrusaun “Uma nahe biti-boot” atinje ona 27%
“Uma Nahe Biti-Boot agora daudaun atinje ona 86,61%. Durasaun kontratu sei to’o iha loron 19 fulan-abríl tinan 2025,” Diretora ne’e hateten ba Agência TATOLI iha edifisiu MJDAC, Lecidere, segunda ne’e.
Tuir planu, nia dehan, konstrusaun “Uma nahe biti-boot” ne’e hanesan salaun enkontru ida no tuir planu atividade importante ne’ebé MJDAC atu realiza bele hala’o iha uma ne’e.
“Uma ne’e tuir planu atu hala’o ba salaun enkontru no atividade importante ruma ne’ebé MJDAC atu halo ne’e, halo de’it iha ne’e. Maibé, bainhira konstrusaun finaliza ona no empreza entrega ona ba MJDAC mak ita foin haree hodi halo jestaun ba fatin referidu,” nia dehan.
Uma ne’e harí ho objetivu atu troka uma ne’ebé antes ne’e iha, maibé anin sobu tiha iha tinan 2021 no funsaun husi uma ne’e hanesan salaun boot ida ba MJDAC hodi realiza enkontru no atividade Ministériu nian.
Projetu konstrusaun “Uma nahe biti-boot” ne’e konstrui husi empreza internasionál husi nasaun Filipina Rocky Construction ho orsamentu tinan 2024 nian husi MJDAC ho montante $378.372,35.
Tuir kontratu ne’ebé MJDAC selebra ho empreza Rocky ho nia durasaun atu termina konstrusaun ne’e durante loron 224 nia laran.
Entretantu, projetu ne’e hahú iha tinan 2023 iha Governu Konstitusionál VIII nia ukun maibé la konsege konklui, no iha Governu Konstitsuionál da-sia (IX) mak loke konkursu públiku no projetu hahú konstrusaun iha fulan-janeiru tinan 2024.
Jornalista : Hortencio Sanchez
Editór : Cancio Ximenes
