DILI, 03 fevereiru 2025 (TATOLI)—Diretór Nasionál Apoiu Servisu Ospitalár (DNSH-sigla portugés) Ministériu Saúde, Carlos de Carvalho Guterres, hateten daudaun ne’e Ospitál Siloam Group iha Jakarta, Indonézia, la simu ona pasiente referénsia husi Timor-Leste (TL).
“Grupu Siloam la simu ona pasiente referrál, tanba ne’e ami tenta atu haruka pasiente sira bá Malázia,” Carlos de Carvalho haktuir ba jornalista Tatoli via telefónika, segunda ne’e.
Nia esplika katak Ospitál Siloam Group la simu ona pasiente referrál TL tanba iha obstákulu balun ne’ebé mak nia rejeita mensiona.
“Dívida sira iha ospitál rai-li’ur hahú selu ona, kuaze millaun $9. Governu tenta atu selu hotu iha tinan ida-ne’e,” nia hateten.
Nia dehan, ba tempu ne’e, pasiente referrál TL sei refere de’it ba ospitál sira iha Malázia, enkuantu iha Singapura sei la halo referénsia tanba kustu karun tebes.
Notísia relevante: KM fó instrusaun ba Ministra Saúde halo levantamentu dívida ezistente iha ospitál rai-li’ur
Daudaun ne’e, nia hatutan, iha pasiente na’in hitu ne’ebé sei halo referrál bá Malázia, no sira sei sai iha semana rua resin.
Carlos informa katak pasiente sira ne’ebé antes ne’e halo tratamentu iha Siloam Group Jakarta, karik kontinua halo tratamentu, pasiente ne’e tenke halo avaliasaun ho médiku iha Hospital Nacional Guido Valadares (HNGV).
“Pasiente ne’e tenke bá HNGV hodi halo koordenasaun ho doutór hodi hetan avaliasaun husi junta médika, nune’e sira bele konfirma ospitál ne’ebé mak bele kontinua halo tratamentu,” nia hakotu.
Antes ne’e, Governu liuhusi reuniaun Konsellu Ministru (KM) ordinária, 25 setembru 2024, deside fó instrusaun ba Ministra Saúde, Élia A.A. dos Reis Amaral, atu halo levantamentu detalladu kona-ba dívida ezistente no prazu pagamentu iha ospitál rai-li’ur, ne’ebé antes ne’e iha kooperasaun serbisu Governu Timor-Leste hodi halo transferénsia pasiente halo tratamentu saúde.
Jornalista: Felicidade Ximenes
Editór: Xisto Freitas da Piedade