DILI, 04 fevereiru 2025 (TATOLI)-Antigu profesór kontratadu 2023 konkorda ona hodi partisipa iha teste espesiál iha tinan ne’e.
“Ami konkorda ona nu’udar parte ida atu solusiona problema ne’e maibé iha parte balun ami sei halo diskusaun molok partisipa teste”, Portavos Eis-Profesór Kontratadu 2023, Agostinho Pinto, hatete via WhatsApp ba TATOLI, segunda ne’e.
Husu kona-ba antigu profesór sira hotu konkorda atu tuir ezame ka oinsá? Nia hatan, “Seidauk, Ministériu sei diskute depois mak informa fali ami, ida-ne’e signifika seidauk iha serteza”.
Antigu Profesór Kontratadu 2023, deside ona atu partisipa iha teste espesiál bolsa kandidatu atu sai manorin, ne’ebé sei loke husi Ministériu Edukasaun (ME), maibé presiza halo tan diskusaun balun liga ba kontribuisaun no dedikasaun prefesór kontratadu 2023 nian, ne’ebé durante ne’e sira kontribui tinan naruk ona.
“Ami deside ona katak, ami sei partisipa teste espesiál bolsa kandidatu ne’e, maibé ita sei iha diskusaun balun liga-ba kontribuisaun no dedikasaun profesór sira-nian, tanba sira kontribui ona ba Estadu durante tinan naruk nia laran, hafoin sira hetan direitu kontratu iha Governu Konstitusionál daualu hodi foti sira-nia estatutu voluntáriu ba ajente administrasaun funsaun públika”, Portavoz antigu Profesór Kontratadu 2023 dehan.
Ministériu Edukasaun liuhusi Portavos Filipe Rodrigues, akompaña husi asesór no dirijente sira, hala’o enkontru ho eis-profesór kontratadu-2023 hodi fó opsaun atu tuir teste espesiál sira liuhusi bolsa kandidatu atu sai manorin iha eskola sira, tuir kuadru pesoál ne’ebé iha. Enkontru ne’e hala’o iha Sala VIP Ministériu Edukasaun, Vila-Verde.
Iha enkontru, Portavos Ministériu Edukasaun, Filipe Rodrigues, hateten, teste espesiál ne’ebé Ministériu Edukasaun oferese ba eis-profesór kontratadu-2023 ne’e ho razaun katak, entre profesór sira ne’e dedika ona sira-nia aan ba prosesu aprendizajen iha eskola sira, no la taka dalan mós ba eis-profesór kontratadu-2023 sira atu bele partisipa mós teste jerál ne’ebé mak loke ba públiku.
“Tinan ne’e sei hahú teste ba nível ensinu sekundáriu jerál no tékniku vokasionál, tanba ne’e ba maluk sira ne’ebé priense rekezitu, bele hola parte iha teste ne’e no sei loke mós teste espesiál ba eis-profesór kontratadu-2023 sira, maibé antes atu hala’o teste, sei fahe mós ‘matrix’ ba públiku inklui ba eis-profesór kontratadu 2023, atu prepara aan ho di’ak antes ba tuir teste”, Portavos ME dehan.
Portavoz ME ne’e hatutan, iha fulan hirak mai oin ne’e, sei iha vagatura iha eskola sira, tanba profesór sira ne’ebé mak tama ba idade reforma ne’e, kuaze rihun rua-resin, tanba ne’e hein de’it Komisaun Funsaun Públika halo remata ona lei liga ho reforma obrigatóriu ne’e, vaga sei barak tebes, hahú husi nível ensinu pré-eskolár to’o ensinu sekundáriu jerál no tékniku vokasionál, liga tan ho profesór sira ne’ebé mak moras prolongada, ne’e kuaze besik rihun haat .
Jornalista: Osória Marques
Editór: Rafael Ximenes de A. Belo