iklan

MUNISÍPIU, VIKEKE

Autoridade Lacluta-Ossú preokupa obra melloramentu bee-moos seidauk finaliza

Autoridade Lacluta-Ossú preokupa obra melloramentu bee-moos seidauk finaliza

Autoridade Lacluta no Ossú preokupa obra melloramentu bee-moos seidauk finaliza. Imajén Tatoli/Vitorino Lopes da Costa.

VIQUEQUE, 04 fevereiru 2025 (TATOLI)—Autoridade postu administrativu Lacluta no postu administrativeu Ossú, munisípiu Viqueque, preokupa ba implementasaun obra projetu melloramentu bee-moos ne’ebé to’o agora seidauk finaliza.

Administrodór postu Lacluta, Pacoal Gama Martins, hateten obra melloramentu ne’ebé implementa iha postu Lacluta kle’ur ona maibé to’o agora seidauk finaliza, nune’e Bee Timor Leste, Empreza Públika (BTL, E.P) presiza aselera servisu kanalizasaun bee-moos hodi komunidade bele asesu.

“Durante ne’e, komunidade enfrenta ba bee-moos maibé obra ne’ebé la’o iha postu Lacluta to’o agora seidauk konklui. Tan ne’e, ha’u husu ba BTL, E.P hodi aselera servisu tanba ita-nia komunidade presiza tebes bee-moos,” nia hateten ba Agência TATOLI iha resintu Administrasaun Munisípiu Viqueque, tersa ne’e.

Nia observa, progresu servisu ba projetu melloramentu iha postu Lacluta ba instalasaun bee ba kada uma-kain dadaun ne’e atinji ba 95%, maibé ba tánke rezervatóriu prodús iha nasaun Austrália maka seidauk to’o iha postu Lacluta.

“To’o oras-ne’e tánke rezervatóriu iha ona Timor ka seidauk ami seidauk hatene. BTL, E.P presiza hakaas emrpeza implementadór hodi fornese ona tánke bee nia hodi konklui servisu,” nia dehan.

Iha fatin hanesan, administradór postu Ossu, Feliciano da Costa Martins, haktuir komunidade Ossú oras-ne’e presiza bee-moos hodi asesu maibé obra ne’ebé BTL, E.P implementa iha ne’ebá to’o agora seidauk konklui.

“Ami agora halerik liu ba bee-moos. Iha ha’u-nia postu rasik, fatin sanitária bee laiha. Komunidade presiza tebes asesu ba bee maibé obra melloramenru bee-moos ne’ebé empreza servisu to’o agora seidauk hotu. Ha’u husu BTL, E.P se bele aselera servvisu, hodi ami bele asesu bee ba nesesidade loro-loron nian,” nia hateten.

Hatán ba preokupasaun ne’e, Koordenadór BTL, E.P, Marito da Costa, hateten obra melloramentu bee-moos ne’ebé implementa iha Lacluta no Ossu ne’e, daudaun ne’e empreza sira kontinua sevisu no BTL, E.P fó ona ultimatu ba empreza implementadór atu finaliza iha fulan-fevereiru 2025.

“Ha’u hakarak relata ba públika katak daudaun ne’e ita-nia emrpeza sei kontinua servisu obra referida. Foin lalais superiór BTL, E.P bolu ona empreza sira hodi konklui obra iha fulan ida-ne’e. Atu hotu ka la kotu, ami lahetene, ami hatene mak obra ne’e hotu tanba la’o kle’ur ona. Kona-ba tánke rezervatóriu ba postu Lacluta ne’e mak prosesu kle’ur, tanba prodús iha Austráli. Maibé, ami ko’alia ona empreza iha fulan ida-ne’e sei to’o iha Lacluta. Bainhira to’o, ita bele distribui ona ba tanke rezervatóriu,” nia dehan.

Projetu melloramentu sistema bee-moos ba Postu Administrativu Lacluta husi foho Bibileo hun ho distánsia kilométru 4,5 ho kustu $582.100.

Projetu ne’e sei benefisia ba abitante Lacluta ne’ebé hela iha Postu Lacluta Vila, area Suku Dilor ho totál populasaun 4.158 ka uma kain 693.

Entretantu, konstrusaun sistema bee-moos ba postu Ossu daudaun neé atinje ona 74%, ne’ebé projetu ne’e implementa iha fulan-marsu-2022 iha munisipiu Viqueque, iha postu administrativu Ossú ne’e ezekuta husi empreza responsavel projetu mak CDFG Unipessoál, Lda.

Notísia Relevante: https://tatoli.tl/2024/02/07/progresu-projetu-melloramentu-bee-moos-iha-postu-ossu-atinje-50/

Jornalista : Vitorino Lopes da Costa

Editór        : Cancio Ximenes

iklan
iklan

Leave a Reply

iklan
error: Content is protected !!