iklan

EKONOMIA, DILI, POLÍTIKA

Komisaun D fiskaliza empreza prodús bee hemu no bebidas lata

Komisaun D fiskaliza empreza prodús bee hemu no bebidas lata

Uma fukun Parlamentu Nasionál. Imajen Egas Cristovão

DILI, 04 fevereiru 2025 (TATOLI)–Komisaun D Parlamentu Nasionál ne’ebé trata asuntu Ekonomia no Dezenvolvimentu fiskaliza empreza ne’ebé prodús bee-hemu hanesan Gota no Fresca, inklui Heineken ne’ebé durante ne’e prodús bebidas lata.

Prezidente Komisaun D, Ricardo Baptista, hatete objetivu fiskalizasaun ne’e haree besik produsaun no investimentu.

Preokupasaun ne’ebé reprezentante povu sira rona husi parte empreza bee-hemu mak valór ba taxa importasaun plástiku husi kopu no botir.

“Bee ne’ebé tama hanesan Danon, Aquase, Bee Minerál  la selu taxa, konsumu baibain de’it, taxa  pursentu lima ou 2.5. Tuir ita-nia hanoin, lei Orsamentu Jerál Estadu 2025 ne’ebé aprova, kada bee litru sei kona $3 ho ida ne’e parte husi Governu aplika lei, nune’e asegura ita-nia produtu sira iha rai-laran”, deputadu Ricardo hatete ba TATOLI iha resintu PN, tersa ne’e.

Problema seluk ne’ebé durante ne’e kompañia sira hasoru mak eletrisidade mate-lakan. Situasaun ne’e ninian efeitu ba prosesamentu hamanas botir bee-hemu.

“Preokupasaun seluk mak infraestrutura, estrada la di’ak atu halo distribuisaun bee  bá munisípiu no postu ne’ebé dook”, akresenta.

Durante fiskalizasaun, entidade emprezariál bee-hemu ne’e mos husu atu hatutan ba ezekutivu hodi estabelese laboratóriu, teste sertifikasaun kualidade produtu iha rai-laran.

Kestaun seluk husi parte Heineken nian, tuir deputadu ne’e mak seidauk halo kontrolu ne’ebé di’ak ba bebidas importasaun ho marka Sprite no tua. “Ita fó taxa boot ba sira no sira ne’ebé importa mai ladun kontrola ho di’ak, entaun ba sira (Heineken) susar iha merkadu”, katak nia.

Ho atividade illegál iha parte fronteira, nia rekomenda ba parte kompetente kontrolu ho másimu. Nune’e mos, durante fiskalizasaun komisaun  enkoraza empreza sira hakbiit-án aumenta liu-tán produsaun.

Notísia relevante: PN aprova taxa impostu seletivu konsumu aplikável iha 2025 

PN aprova ona proposta-lei OJE 2025 kona-ba taxa impostu seletivu konsumu aplikável.

Jornalista       : Nelson de Sousa

Editora           : Rita Almeida

iklan
iklan

Leave a Reply

iklan
error: Content is protected !!