iklan

MUNISÍPIU, VIKEKE

PAM Viqueque orienta SMAPPF halo prevensaun ba animál mate iha Uatulari

PAM Viqueque orienta SMAPPF halo prevensaun ba animál mate iha Uatulari

PAM Viqueque orienta SMAPPF solusaun ba komunidade nia manu-haki’ak moras no mate iha postu Uatulari. Imajén Tatoli/Vitorino Lopes da Costa.

VIQUEQUE, 04 fevereiru 2025 (TATOLI)—Prezidente Autoridade Munisípiu (PAM) Viqueque, Francisco Cruz Simões de Gonzaga Soares, orienta Servisu Ministériu Agrikultura Peska, Pekuária no Floresta (MAPPF) Viqueque buka solusaun hodi halo medida prevensaun ba animál mate liuliu peste ataka kamunidade nia manu-haki’ak moras no mate.

“Ha’u husu diretór SMAPPF oinsá haree komunidade Uatulari sira-nia halerik ba manu-haki’ak ne’ebé moras no balun mate ona. Ida-ne’e to’o agora ita seidauk hetan prevensaun, maibé mídia fó sai ona. Tanba ne’e, ha’u hato’o ba SMAPPF pelumenus responde,” PAM Viqueque ne’e hato’o hafoin enkontru ho diretór sira, iha salaun munisípiu Viqueque, ohin.

Nia husu ba Diretór SMAPPF, karik estoke ai-moruk ba prevensaun peste manu nian mak laiha ona, tenke kontaktu ba nasionál oinsá fó solusaun ba peste ne’e.

“Se (manu moras) ida-ne’e mak ita husik no nonook hela de’it, ne’e susar tanba ida-ne’e ita hotu nia problema. Ne’ebé, ita tenke buka solusaun ba manu-haki’ak ne’ebé oras-ne’e moras no mate,” nia fó hanoin.

Iha biban ne’e, administradór postu administrativu Uatulari, Jorgé Ribeiro, haktuir daudaun ne’e komunidade Uatulari ninia manu-haki’ak sira-ne’e peste kona entaun balun moras no balun mós mate.

“Maibé, pesoál saúde animál ne’ebé koloka iha Uatulari ne’e agora lahetene ninia paradeiru, entaun labele halo prevensaun ba komunidade nia manu-haki’ak ne’ebé mate. Ha’u husu diretór SMAPPF koloka saúde animál ba Uatulari hodi halo prevensaun ba manu sira-ne’ebé moras ne’e,” nia hateten.

Hatán ba preokupasaun ne’e, Diretór SMAPPF Viqueque, Olivio Soares Freitas, haktuir manu haki’ak ne’ebé daudaun mate, SMAPPF Viqueque labele halo buat ruma tanba doutór animál sira-ne’ebé destaka iha Viqueque ne’e mesak kontratatdu no sira-nia kontratu ramata ona, no seidauk asina fila-fali kontratu hodi fó atendementu ba komunidade nia animál sira.

“Ami iha funsionáriu pekuáriu permanente na’in-rua (2) de’it. Kontratu ba doutór animál sira-ne’e husi nasionál, ne’ebé ita hein bainhira mak nasionál fó kontratu ba doutór animál sira,” nia realsa.

Tuir dadús, pesoál saúde animál ne’ebé koloka iha Viqueque hamutuk na’in-sia (9) maibé na’in hitu (7) mak daudaun ne’e sira hanesan funsionáriu kontratadu no na’in-rua (2) seluk ne’e funsionáriu permanente,

Pesoál saúde animal ne’ebé koloka ba iha postu administrativu Viqueque Vila hamutuk na’in-haat (4) ho postu Uatulari na’in-tolu (3), maibé sira-nia kontratu ramata ona entaun agora ne’e daudaun hela na’in-rua (2) mak servisu iha SMAPPF Viqueque.

Abitante husi suku Afaloikai, postu Uatulari, Julio Pinto Ribeiro, hateten manu-haki’ak hahú moras iha inísiu fulan-janeiru 2025 to’o agora no manu sira-ne’e mate hotu tanba laiha ai-moruk hodi halo prevensaun.

“Ha’u-nia manu-haki’ak-manu lokál hamutuk 19 mate no manu rade hamutuk 36 mate hotu. Tanba ami laiha ai-moruk ruma, hodi fó ba manu atu prevene ba peste manu moras ne’e,” nia dehan.

Notísia Relevante: Autoridade lokál husu MAPPF koloka pesoál saúde animál iha Matahoi

Jornalista : Vitorino Lopes da Costa

Editór        : Cancio Ximenes

iklan
iklan

Leave a Reply

iklan
error: Content is protected !!