DILI, 04 fevereiru 2025 (TATOLI)-Prezidente Parlamentu Nasionál, Maria Fernanda Lay, reprezentante Governu ho Grupu Sentru Sri Chinmoy, tersa ne’e realiza Peace Run ka marsa ba dame oinsá enkoraza ema hotu kria pás no domin nakonu iha mundu.
“Ohin, ita komemora marsa da páz ne’ebé lori tosa, ohin ita hahú iha ne’e, espera iha 07 fevereiru ita bele hahú halai husi ne’e tosa da páz ne’ebé ohin sunu no delegasaun lori husi rai seluk no kontinuidade sira-nia marsa da pás”, katak Prezidente PN iha resintu PN.
Nia hatutan tan: “Mensajen ita hato’o iha ne’e ho naran marsa da pás bele lori pás mai ita-nia rai, mai ita-nia laran hahú husi ita-nia laran, mai ita-nia família, mai ita-nia viziñu ho povu Timor tomak”.
Tuir nia, ita bele diferente maibé ita Nasaun ida, ne’ebé diferensa ne’e mak enrikese ita-nia demokrásia, ho diferensa ita bele iha diálogu ne’ebé bele rezolve problema.
“Liuhusi diálogu la’ós hanesan funu agora akontese iha mundu tomak, ita espera pás ne’e sei lori mensajen ne’ebé di’ak tebes husi Timor hanesan ohin sira hatete, sira imprensiona tebe-tebes ho situasaun ita-nia rai-laran, no mós ho prezensa líder sira iha ne’e ne’ebé fó mensajen di’ak ba ita-nia juventude ne’ebé sei halo buat ruma ba ita-nia rai iha future”, akresenta.
Líder segundu órgaun soberania, espera pás ida agora la’o iha ne’e sei kontinua ba mundu no hada’et ba mundu tomak ne’ebé ita presiza pás, trankuilidade hodi bele halo dezenvolvimentu.
Diretór Ezekutivu Peace Run, Salol Wilson, hateten pás ne’e hahú husi armónia, laran luak, fuan boot no hahú husi ema ida-idak. Depois pás ne’e sei lori ba iha família ida-idak nia laran no bainhira lori ba família ida-idak nia laran pás ne’e sei buras iha ne’eba, hodi halo buat di’ak hanesan mós bainhira sei iha família pás hotu ona mak ida ne’e sei espalla ba mundu tomak. Nune’e se ema hotu-hotu halo di’ak mak ida ne’e sei inspira ema hotu.
Nia hato’o mensajen ba timoroan hotu atu kontinua kria pás. “Ema hotu-hotu bele muda mundu ne’e, la’ós de’it polítiku sira de’it la’e, ita hotu laran di’ak no iha vontade di’ak haree ema seluk di’ak, ida ne’e sei bele muda mundu”, nia hato’o.
Tuir nia, ida ne’e akontese bainhira ita iha parseria de’it, “Ami mai iha ne’e mós tanba iha buat ida parseria kolaborasaun ne’e, serbisu hamutuk ho Ministériu Edukasaun (ME) ho entidade sira seluk hodi realiza eventu refere”, tenik.
Nia dehan kontente bele serbisu hamutuk ho Governu Timor-Leste (TL) realiza eventu ne’e.
Marsa ne’e hala’o durante loron haat iha TL no iha 08 fevereiru ekipa fila-fali ona, no tuir ajenda ekipa sei halo vizita ba eskola iha Likisá, Ermera no iha 07 fevereiru sei la’o marsa ba pás fó volta iha Dili ho kilómetru hitu.
Eventu Peace Run partisipa husi Vise Primeiru Ministru asuntu Ekonómiku, Francisco Kalbuady Lay ho Vise Primeiru Ministru ba asuntu Sosiál, Mariano Assanami Sabino, menbru IX Governu Konstituisionál balun, membru deputadu no estudante sira.
Programa ne’e grupu Sentru Sri Chinmoy hahú iha 1987 no to’o ohin loron kontinua nafatin. Atividade ne’e selebra faktu ida ne’ebé nakonu pás no domin. Programa Peace Run hala’o iha nasaun hotu iha mundu hodi hasoru ema lubun ne’ebé fó inspirasaun, liliu líder sira iha mundu ne’ebé kontinua luta ba pás.
Sri Chinmoy Kumar Ghosel moris iha 27 agostu 1931 no mate iha 11 outubru 2007, nu’udar filozófu no profesór iha Índia ne’ebé sai imigrante iha Amérika iha 1964. Nia hanesan eskritór ida, kompozitór múzika, artista no atleta ne’ebé produtivu.
Sri Chinmoy famozu tanba halo promosaun ba serimónia públiku ho tema dame konsiénsia nian no armonia mundu nian hanesan halo konsertu dame, meditasaun no kompetisaun halai taru.
Ninia doutrina mak hanorin liu kona-ba serbí mundu no toleránsia entre relijiaun ne’ebé ninia baze mak fiar bá Wedanta ninia pensamentu moderna katak fiar ne’e mak Maromak.
Notísia relevante: Peace Run enkoraja ema hotu kria pás iha mundu
Jornalista : Nelson de Sousa
Editora : Rita Almeida
