VIQUEQUE, 05 fevereiru 2025 (TATOLI)—Kámara Komérsiu Indústria Timor Leste (CCI-TL) munisípiu Viqueque observa ba presu nesesidade bázika ne’ebé faan iha kapitál munisípiu Viqueque sei normál.
Prezidente CCI-TL munisípiu Viqueque, Florencio Guterres da Costa, hateten presu folin nesesidade bázika kapitál Viqueque daudaun ne’e sei normál no empreza ne’ebé faan nesesidade bázika seidauk hasa’e presu sasán.
“Presu foos marka Ikan Mas, Manu Vitoria henesan kilógrama 25 ne’e dadaun ne’e iha kapitál Viqueque folin $18 no foos Folsom kilógrama 20 ne’e ho folin $20,50. Maibé, presu ne’e faan iha Viqueque Vila ba postu sira mak mudansa tanba kustu ba operasionál,” Prezidente CCI-TL munisípiu Viqueque ne’e hateten ba Agência Tatoli, iha postu Viqueque Vila, kuarta ne’e.
Nia relata, presu foos ne’ebé folin foos ne’ebé sei normál ne’e postu Ossú no Viqueque Vila, maibé ba postu Uatulari, Uatucarbau no Lacluta presu iha mudansa tanba distánsia no kondisaun estrada.
“Ba postu sira-ne’ebé folin sa’e ne’e tanba kondisaun dalan liga ba postu no to’o iha área rurál aat. Ho ida-ne’e mak ita-nia empreza sira hasa’e presu bazeia ba komparasaun kustu viajen. Se ita faan normál hanesan iha kapitál entaun ita-nia empreza sira lakon,” nia dehan.
Nune’e, nia husu empreza sira iha Viqueque mantein ho presu normál ne’bé Governu deside tanba kada fulan Autoridade Inspasaun Atividade Ekonómia, Sanitária no Alimentár, Institutu Públiku (AIFAESA, I.P) kontrola folin sasán sira.
“Nune’e, ita tenke faan sasán tuir presu ne’ebé ita-nia Governu fó sai. Ita bele hasa’e maibé haree ba distánsia maibé labele presu sa’e liu hodi fó impaktu ba ita-nia komunidade,” nia hateten.
Tuir folin nesesidade bázika ne’ebé faan iha loja Borala hanesan mina-tein ka mina-konsumu ne’e litru lima (5) ho folin $6,50, foos kilógrama 25 saka ida ho folin $18, foos Folsom kilógrama 20 kada saka ida ho folin $20,50.
Iha fatin seluk, komunidade suku Bahatata, postu Uatucarbau, munisípiu Viqueque, Marcos Freitas, haktuir folin foos ne’ebé faan iha suku Bahatata ne’e folin sa’e hodi prezudika komunidade atu sosa foos ba konsumu loro-loron.
“Daudaun ne’e, iha ami-nia suku folin foos iha kioske sira hanesan foos kilógrama 25 ne’e kada saka ida ho folin $20 no foos kilógrama 20 ne’e kada saka ida ho folin $17, foos marka Manu Vitoria no sira seluk kuaze folin hanesan. Folin foos tun oituan ne’e bainhira negosiante sira faan ho karreta husi Uatulari mak mai faan iha ne’e mak foos kilógrama 25 kada saka ida ho folin $18 no foos kilógrama 20 ne’e kada saka ida ho folin $15,” nia informa.
Notísia Relevante: https://tatoli.tl/2025/01/22/xefe-aldeia-preokupa-folin-foos-iha-uelakurata-afaloikai-sae-21/
Jornalista : Vitorino Lopes da Costa
Editór : Cancio Ximens
