DILI, 05 fevereiru 2025 (TATOLI)—Diretór Servisu Nasionál Ambulánsia Emerjénsia Médiku, Institutu Públiku (SNAEM, I.P), Simplício Amaral de Deus, hateten estoke mina ne’ebé mak iha SNAEM. I.P sei sufisiente hodi distribui bá kada munisípiu sira hodi utiliza ba tula pasiente sira.
“Ita-nia estoke mina iha nasionál sei sufisiente ba ambulánsia sira, tanba mina ne’e orsamentu tinan 2024 nian ne’ebé agora daudaun sei iha estoke hamutuk litru rihun 35,” Simplício Amaral de Deus, informa ba TATOLI iha nia kna’ar fatin, tersa (04/92/2025).
Nia haktuir, mina iha nasionál estoke sufisiente hela, soké iha problema balun iha baze ne’ebá mak laiha liña koordenasaun. Atu evakua pasiente mak mina laiha ruma, bele hakbesik an ba ambulánsia nune’e bele oferese mina, tanba SNAEM nia objetivu mak atu evakua pasiente husi área remota, mai iha fasilidade saúde hanesan ospitál rejionál, referrál no ospitál nasionál hodi hetan tratamentu husi médiku sira.
Nia reforsa, mina sira ne’ebé mak iha munisípiu sira-ne’e kada servisu ambulánsia iha estasionamentu ketak-ketak, nune’e daudaun ne’e eziste estasionamentu iha munisípiu hitu no iha munisípiu sira ne’ebé mak besik ne’e sira uza de’it númeru seriál.
Notísia relevante: 2024, ambulánsia transporta pasiente hamutuk 14.791
“Iha munisípiu hitu, eziste estasionamentu tanke mina iha ne’ebá. Ami asegura tanke ho kapasidade litru rihun 5 ba munisípiu sira ne’ebé besik hanesan Manatuto, Aileu, Liquiçá no Ermera ne’e uza númeru seriál. Seriál ne’e ami fó dala ida bainhira sira halo pedidu ami fó $2.500. Sira uza ba fulan tolu no haat. Hotu tiha sira mai halo fali pedidu. Tanba ne’e mak ami tau iha-ne’e estoke nasionál no munisípiu mós asegura metin. Tanba ne’e mak isu iha baze dehan mina laiha dalaruma ami mós konfuzaun uitoan,” nia subliña.
Simplício tenik katak ambulánsia ne’ebé mak ho tinan naruk hanesan 01, 02 no 03, ne’e mak haree ba labele halo servisu ona, ida-ne’e hatama ba patrimóniu Estadu.
“Ambulánsia ne’ebé tuan, kondisun ladún di’ak ona. Ida-ne’e labele halo servisu ba evakuasaun pasiente tanba fó risku ba kondutór, profisionál saúde sira no pasiente rasik. Totál ambulánsia iha territóriu tomak inklui RAEOA hamutuk 23,” nia konklui.
Antes ne’e, Diretór SNAEM, I.P deklara katak durante tinan 2024, ambulánsia tula pasiente sira ne’ebé halo transferénsia mai Hospital Nacional Guido Valadares (HNGV) hamutuk 14.791.
“Durante tinan ida ita halo transferénsia pasiente husi munisípiu hotu mai HNGV hamutuk 14.791. Husi númeru ne’e, maioria inan isin-rua ne’ebé ho kazu komplikadu,” Simplício informa ba TATOLI, iha nia kna’ar fatin.
Jornalista: Felicidade Ximenes
Editór: Xisto Freitas da Piedade
