DILI, 05 fevereiru 2025 (TATOLI)–Prezidente Tribunál Rekursu, Deolindo dos Santos, informa, juís foun timoroan na’in-13 sei hala’o serbisu iha Tribunál, iha jullu 2025.
“Tuir previzaun Governu nian, hahú jullu 2025, pelumenus juís foun atu mai tan tama ba Tribunál na’in-13 ne’e timoroan, sira ne’ebé formasaun halo iha ne’e, tuir loloos sira bá estájiu ona mais iha alterasaun diploma ne’ebé Governu halo no konsellu respeita, katak ita kontinua fali ho faze prátika iha Portugal durante neen nia laran depois sei fila mai mak ba estájiu,’’ Deolindo dos Santos hateten ba jornalista sira, iha resintu Parlamentu Nasionál (PN), kuarta ne’e.
Notísia relevante : Governu presiza fó prioridade aumenta juís no prokuradór
Nia dehan, sira na’in-13 ne’e daudaun iha Portugal no sira sei termina iha fin juñu no sei filafali mai no komesa serbisu iha inísiu jullu 2025.
Ho juís foun ne’ebé iha sei rezolve problema ho rekursu umanu iha Tribunál.
“Koloka tan juís na’in-rua iha Baucau, ida iha Suai, ida iha Óe-cusse no na’in ualu ka sia koloka iha Dili no balun promove ba iha Tribunál Rekursu hodi rezolve problema falta prienxe plenáriu,’’ akresenta.
Antes ne’e, Tribunál iha juís na’in-35, maibé iha juís na’in-rua mate ona, ida juveladu, ida reforma, ida husu demisaun no ida demitidu, entaun agora hela na’in-30.
Jornalista : Nelson de Sousa
Editora : Julia Chatarina
