DILI, 05 fevereiru 2025 (TATOLI)–Konsellu Superiór Majistratura Judisiál (KSMJ) deside prosesu averiguasaun no disiplinár hamutuk 20 ba majistradu judisiál (juís) no ofisiál justisa durante tinan 2024 to’o janeiru 2025.
“Konsellu deside ona kona-ba juís no ofisiál justisa sira-nia hahalok. Komesa 01 janeiru 2024 até fin janeiru 2025 Konsellu deside ona prosesu 20, ne’ebé fó sansaun disiplinár ba juís no ofisiál justisa sira,” Prezidente Tribunál Rekursu, Deolindo dos Santos, informa ba jornalista sira iha resintu Parlamentu Nasionál, kuarta ne’e.
Notísia relevante : KSMJ sei diskute juíz lori karreta Estadu treinu nia oan
Prosesu 20 ne’e iha arkivamentu lima, adverténsia ida, represaun eskrita ida, pena multa ida, suspensaun exersísiu haat, demisaun ida, prosesu suspensu aguarda desizaun rua, konversaun disiplinár tolu, no motivu seluk tolu.
Maski nune’e, Deolindo dos Santos, la esplika detallu kona-ba sansaun no infrasaun ne’ebé juís no ofisiál justisa komete.
Jornalista : Nelson de Sousa
Editora : Julia Chatarina
