iklan

JUSTISA, HEADLINE

KSMJ sei diskute juíz lori karreta Estadu treinu nia oan

KSMJ sei diskute juíz lori karreta Estadu treinu nia oan

Karreta Estadu ne’ebé juíz ida uza treinu nia oan. Imajen espesiál

DILI, 03 fevereiru 2025 (TATOLI)—Prezidente Tribunál Rekursu, Deolindo dos Santos sei konvoka reuniaun Konsellu Superiór Majistratura Judisiária (KSMJ) iha sesta (07/02), hodi diskute  juíz ida-ne’ebé lori  karreta Estadu treinu nia oan iha Tasi-Tolu, Dili, sábadu (01/2/2025).

“Ha’u hanoin kazu ida-ne’e virál  ona. Ema hotu hatene. Bainhira desizaun sai, ita-boot sira sei hatene katak desizaun ba kazu ida-ne’e mak ida-ne’e,” Deolindo hateten ba jornalista sira iha edifísiu Tribunál Rekursu, segunda ne’e.

Deolindo dehan, lei ne’e vale ba ema hotu. Lei la’ós ba juíz sira de’it. “Ha’u atu dehan ba ita-boot sira no ba públiku Timor tomak katak lei ne’e vale mós ba ha’u mezmuke ha’u hanesan juíz prezidente. Laiha tratamentu espesiál ba ema ida,” nia realsa.

Nia esplika katak Konsellu Superiór Majistratura Judisiáriu sei halo prosesu averiguasaun, depois prosesu averiguasaun sei tama bá prosesu disiplinár.

Deolindo husu ba públiku katak bainhira hetan juíz ka ofisiál justisa uza karreta Estadu fora oras serbisu hodi bá halo interese privadu, favór hato’o keixa bá Tribunál Rekursu para haree kestaun ida-ne’e.

Iha sábadu tuku 10:00 Otl, juíz ida ho inisiál AN ne’ebé halo funsaun hanesan juíz iha Tribunál Judisiál Primeira Instánsia Dili, lori karreta Estadu ho xapa matríkula 008 TDD bá fó treinu nia oan iha área Tasi-Tolu. Hahalok ne’e virál iha rede sosiál tanba momentu ne’e ema balun mak hasai foto hodi halo postajen iha facebook.

Jornalista: Natalino Costa

Editór: Xisto Freitas da Piedade

iklan
iklan

Leave a Reply

iklan
error: Content is protected !!