DILI, 05 fevereiru 2025 (TATOLI)–Ministru Negósiu Estranjeiru no Kooperasaun (MNEK), Bendito Freitas, informa daudaun ne’e atu reativa institutu diplomata iha MNEK maibé sei prepara kuríkulu.
Notísia Relevante: MNEK reativa ona sentru formasaun diplomata
“Institutu diplomata foin hahú, ami sei halo lai kuríkulu no prepara halo didi’ak mak estabelese ba oin,” Ministru Negósiu Estranjeiru no Kooperasaun (MNEK), Bendito Freitas, hateten ba Agência TATOLI iha edifisiu MNEK, tersa (04/02) ne’e.
Antes ne’e, Sekretáriu Jerál Ministériu Negósiu Estranjeiru no Kooperasaun (MNEK), Francisco Cepeda, dehan iha tinan ne’e ministériu reativa ona sentru formasaun diplomata ba funsionáriu MNEK sira.
Institutu diplomata
Sentru diplomata ne’ebé antes ne’e iha, reativa ona no disponibiliza formasaun lubuk ida ba diplomata foun sira, agora daudaun sei paradu hela tanba Ministeriu sei elabora kúrikulu.
Formasaun ne’ebé antes ne’e fó ba formandu sira mak hanesan lian inglés tanba MNEK servisu hamutuk ho Nova Zelandia ho LELI no sei loke mós formasaun seluk ba diplomata sira.
Iha institutu diplomata ne’e, MNEK halo mós peskiza ida, atu haruka diplomata sira ba tuir formasaun iha diáspora hanesan Austrália, Nova Zelandia no nasaun sira seluk iha ASEAN.
Maibé, iha tinan 2019-2021, mundu afeita ho surtu COVID-19, formasaun ba diplomata sira iha Institutu Diplomata MNEK nian ladún la’o másimu, maibé kontinua fali de’it saida mak antes ne’e iha tiha ona, hodi haruka diplomata sira ba tuir formasaun iha rai-li’ur.
Formasaun ba diplomata ne’e loke direta ba funsionáriu hotu ne’ebé servisu iha MNEK. Iha formasaun ne’e, formadór sira mai husi rai-li’ur, balun diretór sira hosi MNEK no embaixadór balun ne’ebé iha esperiénsia másimu iha diplomasia.
Notísia Relevante: MNEK realiza formasaun ba diplomata iha área diplomasia no ekonomia azúl
Jornalista : Hortencio Sanchez
Editór : Cancio Ximenes
